Nanghulga si Rodrigo Duterte niadtong Setyembre 24 nga dili siya magduhaduhang gamiton ang militar oras nga “mahimong gubot” ang eleksyon sa 2022. Sa daghang higayon, salig ang tirano nga pabiling gunit niya ang pagsalig sa mga heneral sa Armed Forces of the Philippines (AFP) tungod sa iyang padayon nga pagbubu og pabor alang kanila.

Sa badyet pang-2022, ₱222 bilyon ang ginapangayo sa Department of National Defense (DND), ang ahensyang nagadumala sa militar—mas taas og ₱16.2 bilyong kumpara karung tuiga.

Ang Philippine Army magadawat og ₱103 bilyon. Ang kapin 100,000 pwersa niini ang tighasol karon sa mga baryo ug komunidad sa brutal nga gyera kontra-insurhensiya sa rehimen. Parehong tig-₱32 bilyon ang madawat sa Navy ug Air Force.

Halos ₱630 milyon ang direktang pagakontrolon sa upisina ni Sec. Delfin Lorenzana. Kabahin niini ang ₱109 milyon alang sa puno sa anomalyang programa sa pagpasurender nga Enhanced Comprehensive Local Integration Program. Gisugyot usab ni Lorenzana nga ang paghatag sa ₱35 bilyon alang sa programang “modernisasyon” sa AFP isalig kang Duterte. Daw dugang kini sa pork barrel sa presidente nga mamahimo niyang ipanghatag sa paboritong mga heneral.

Nagbaha ang pork barrel

Gawas sa badyet sa DND, aduna pay laing ₱29.2 bilyon nga ginabangayo ang National Task Force to End Local Communist Armed Conflict (NTF-ELCAC). Miburot ang badyet sa ahensya og ₱11 bilyon kumpara sa kasamtangang tuig.

Ang ₱28.12 bilyong bulto sa ginapangayo niining pondo subling mapadulong sa Barangay Development Program (BDP). Ilalum sa BDP, magadawat kuno og ₱20 milyon ang kada barangay nga “nalimpyo” na sa impluwensya sa rebolusyonaryong kalihukan. Niadto pang Enero 2021 gibutyag sa Partido ang BDP isip pork barrel sa mga heneral aron kontrolon ang mga gubernador ug meyor sa eleksyong 2022. Dugang ₱1.08 bilyon ang gipangayo sa Department of Interior and Local Government para pangpuno sa pondo sa NTF-ELCAC.

Para niining tuiga, mibaha na ang pork barrel sa BDP sa balwarte sa pamilyang Duterte sa Davao City ug rehiyon sa Davao. Anaa sa ₱4.3 bilyon ang gigahin sa rehiyon, samtang ₱1.64 bilyon usab ang sa Davao City. Gibubuan usab og pondo ang Caraga, Northern Mindanao ug Soccsksargen (South Cotabato, Cotabato, Sultan Kudarat, Sarangani, General Santos).

Sa mga rehiyong gipaburan sa pondo sa BDP nahitabo ang dakung ihap sa mga pagpatay sa mga sibilyan, iligal nga pag-aresto ug uban pang paglapas sa tawhanong katungod sukad nga milingkod si Duterte sa pwesto hangtud sa tunga-tunga niining tuig.

Ang mga magbabalaod lang sa blokeng Makabayan ang mikontra sa pagratsada sa rehimen sa kontra-katawhang badyet niini. Samtang, nagsaad usab ang pipila ka senador nga haw-asan og pondo ang NTF-ELCAC.