Mga tsuper batok sa pagtaas sa presyo sa lana. Nagprotesta ang mga tsuper ug kabatan-onan sa East Avenue, Quezon City niadtong Oktubre 5 aron kundenahon ang unum ka semanang sagunson nga taas-presyo sa lana. Sa banabana sa Piston, mikabat na sa ₱4 kada litro ang giusbaw sa presyo sa gasolina, ₱5.65 kada litro sa diesel samtang ₱5.30 usab sa kerosene.

Pangkalibutang Adlaw sa mga Magtutudlo. Gidumdum sa Alliance of Concerned Teachers ang Pangkalibutang Adlaw sa mga Magtutudlo niadtong Oktubre 5 sa Mendiola, Manila. Gipanawagan nila ang disenteng sweldo, benepisyo ug ayuda taliwala sa krisis sa ekonomiya ug panglawas. Gikundena usab nila ang nagkagrabeng atake sa rehimeng Duterte ug pagpasagad niini sa laygay nga kahimtang sa mga magtutudlo. Aduna usay protesta ang mga magtutudlo sa Manila Science High School sa gawas sa ilang eskwelahan.

Demolisyon sa Manila Bay, gibabagan. Nagpiket ang mga mangingisda ug grupong maki-kinaiyahan atubangan sa Manila Bay niadtong Setyembre 24 aron kundenahon ang padayon nga pagduso sa rehimeng Duterte nga idemolis ang mga pangisdaanan sa tuway ug tahong sa Cavite City, Bacoor City, Noveleta ug Kawit. Kauban sa mga mangingisda ang mga aktibistang maki-kinaiyahan nga nagprotesta isip pakighiusa sa Global Climate Strike.

Kabataan Partylist, nagpiket sa Comelec. Nagpiket niadtong Setyembre 29 ang mga myembro sa Kabataan Partylist atubangan Comelec sa Intramuros, Manila aron ipanawagan ang komprehensibo, hapsay ug dali nga pamaagi sa pagrehistro alang sa minilyon pang potensyal nga mga botante. Niadtong Setyembre 30, gipalungtad na ang pagparehistro hangtud Oktubre 31.

Mga mamumuo sa piyer, ibalik na. Nagpiket ang Unyon ng mga Manggagawa sa Harbour Centre atubangan Department of Labor and Employment (DOLE) niadtong Setyembre 30 aron iduso ang pagpagula niini og kamandoan para makabalik na sa trabaho ang 216 ka mamumuong gitangtang sa kumpanya niadtong Enero. Subay kini sa desisyon sa Korte Suprema niadto pang Hunyo 28 nga nagmando nga ibalik na sila ug himuong regular. Ayha niini, 2017 pa nagdesisyon ang DOLE nga angayan silang himuong regular.