Pormal nga gipili sa koalisyong Makabayan sa nasudnong kumbensyon niini niadtong Setyembre 27 silang Atty. Neri Colmenares ug unyonistang si Elmer Labog isip kandidato sa pagkasenador sa eleksyong 2022. Ayha niini, nag-anunsyo niadtong Setyembre 26 ang mga progresibong partidong Bayan Muna, Anakpawis Partylist, Gabriela Women’s Party, Kabataan Partylist ug ACT Teachers Partylist sa kumpletong listahan sa ilang mga nominado sa Kongreso.

Gipili sa Bayan Muna isip unang nominado niini si Teddy Casiño, sunod si Rep. Ferdinand Gaite isip ikaduhang nominado ug si Amirah Lidasan, kinatibuk-ang kalihim sa Moro Christian People’s Alliance ug kumbenor sa Sandugo.

Subling gipili sa Gabriela Women’s Party si Rep. Arlene Brosas isip unang nominado. Nagbarog isip ikaduha ug ikatulong nominado silang Dr. Jean Lindo ug Lucy Francisco.

Gipili sa Anakpawis Partylist ang kanhing kalihim sa Department of Agrarian Reform ug representante niini gikan 2004 hangtud 2013 nga si Rafael “Ka Paeng” Mariano isip unang nominado. Silang Lana Linaban sa Kilusang Mayo Uno ug Francisco Mariazeta, Jr. ang mobarog nga ikaduha ug ikatulong nominado sa partido.

Gipili usab sa ACT Teachers Partylist ang kasamtangan niining representante sa Kongreso nga si Rep. France Castro isip unang nominado. Silang Antonio Tinio, nga mirepresenta sa partido sa Kongreso gikan 2010 hangtud 2019, ang ikaduhang nominado ug si Dr. David Michael San Juan ang ikatulo.

Si Raoul Manuel, kanhing presidente sa National Union of Students of the Philippines, ang gipili sa Kabataan Partylist isip unang nominado. Silang Angelica Galimba ug Jandeil Roperos ang magsilbing ikaduha ug ikatulong nominado sa partido.