Gitaho sa mga yunit sa Bagong Hukbong Bayan (BHB) ang dayag nga paglapas sa Armed Forces of the Philippines (AFP) sa internasyunal nga makitawhanong balaod sa pagmasaker sa upat ka Pulang manggugubat sa Negros. Duha ka manggugubat usab sa Cordillera ang gidagit ug gitortyur aron “mosurender.”

Wala nay katakus nga mosukol ug tulog ang upat ka Pulang manggugubat dihang gipatay sila sa mga tropa sa 303rd IBde sa Hacienda Builders, Barangay San Pablo, Manapla, Negros Occidental niadtong Setyembre 30, alas-2 sa kaadlawon. Nagpadangop ang upat sa nasangpit nga lugar aron magpaayo sa trangkaso.

Giparangalan sa BHB-Negros Island ang upat nga namartir nga silang Marilyn Badayos (Ka Monet), Rudy Carbajosa (Ka Brod), Ronilo Desabille (Ka Wowie), ug Rufino Bocaval (Ka Simo).

Kapin usa ka bulan nang gitago sa 503rd IBde ang magtiayong Ricca Llanes ug Daniel Ladawan, Jr. nga gidagit sa mga tropa niini niadtong Agosto 7. Makigkita unta ang magtiayong Pulang manggugubat sa ilang mga paryente. Gipreso sila sa hedkwarters sa 503rd IBde sa Calanan, Tabuk City, Kalinga ug gihikawan sa katungod nga mokuha og abugado ug makita sa pamilya.

Pagpatay. Girakrakan sa mga elemento sa 9th ID si July Barotillo, kanhing lider sa grupong Bayan, sa iyang balay sa Barangay Lamon, Goa, Camarines Sur niadtong Oktubre 1. Nangatungdanan siya isip Barangay Secretary sa ilang lugar.

Pag-aresto. Gipreso sa gama-gamang kasong pagpatay ang boluntir nga magtutudlo sa eskwelahang Lumad nga si Lorena Sigua. Giaresto siya niadtong Setyembre 19 sa mga pulis sa utlanang lungsod sa Marilao ug San Jose del Monte sa Bulacan.

Unum nga sibilyan ang iligal nga giaresto sa militar sa Masbate human giakusahang mga myembro sa BHB. Giaresto niadtong Setyembre 26 si Chito Huligañga sa Barangay Nainday, Placer. Malisyosong giakusahan ang biktima isip taas nga upisyal sa BHB.

Ayha niini, giaresto silang Michael Funelas, Myra Letada, Maricris Letada, Sheryl Salazar ug Vicky Ontog niadtong Setyembre 25 sa Barangay Piña, San Jacinto.

Sa taho sa BHB-South Central Negros niadtong Oktubre 4, giaresto sa mga sundalo ang mag-uumang si Pedro Montecino ug anak nga si Christopher sa Sityo Kubay-Anahaw, Barangay Carabalan, Himamaylan City. Hangtud karon gunit pa sa 94th IB ang mag-amahan.

Giaresto sa mga pulis ug militar sa gama-gamang mga kaso silang Lino Baez sa Bayan-Batangas ug Willy Capareño sa Anakpawis-Batangas sa tinutuluyang bahay sa Manggalang 1, Sariaya, Quezon alas-2 sa buntag niadtong Oktubre 6. Ginapangita pa sa pamilya kung asa sila gidala.

Pagpamomba. Pipila ka hugna nga nanghulog og bomba ang Philippine Air Force (PAF) sa Barangay Dungeg, Sta. Teresita, Cagayan niadtong Setyembre 21 na grabeng miguba sa umahan ug panginabuhian sa mga mag-uuma.

Sa Northern Samar, giistraping ug unum ka bomba ang gihulog sa militar gamit ang usa ka FA-50 fighter jet ug uban pang eroplanong iggugubat sa San Francisco, Las Navas niadtong Setyembre 16. Milungtad ang pagpamomba og halos pito ka oras nga nagtukmod sa mga residente nga temporaryong magbakwit sa kasikbit nga baryo.

Sa misunod nga adlaw, naghulog usab ang PAF og bomba ug nangistraping sa Barangay E. Duran, Bobon. Natukmod ang 2,000 ka residente nga temporaryong magbakwit sa sentro sa Bobon.