Nahuman na ang pagsumite sa mga papeles sa mga kandidato niadtong Oktubre 8 apan wala pa napinal ang ganay sa mayor nga mga partido. Sa ulahing adlaw sa pagsumite, gihimong kataw-anan sa pundok ni Rodrigo Duterte ang proseso dihang kalit nga mitunga si Sen. Ronald de la Rosa isip kandidato sa pagkapresidente sa PDP-Laban. Mismong si de la Rosa ang nagpadayag nga ang iyang pagsumite tungod sa wala pa nag-anunsyo sa kandidatura si Sara Duterte.

Sa ulahing han-ay, unum ka president ug lima ka bise-presidente ang midagan ilalum sa mga reaksyunaryo ug konserbatibong pulitikanhong partido. Ang mga natibuok nga pangkumbuya mao ang mosunod: Leni Robredo-Kiko Pangilinan alang sa Liberal Party, Isko Moreno-Willie Ong alang sa Aksyon Demokratiko, Ping Lacson-Tito Sotto sa Partido Reporma, Bato de la Rosa-Bong Go sa PDP-Laban (paksyong Cusi), ug Manny Pacquiao-Lito Atienza sa partidong Promdi. Midagan nga walay katimbang si Ferdinand Marcos, Jr. ilalum sa Partido Federal sa Pilipinas, usa ka partido nga gitukod sa mga alipures ni Duterte.

Wala pa gihapon nahuman ang ganay sa pagkasenador. Miinit niining Oktubre ang wala paglakip kang Neri Colmenares sa koalisyong Makabayan sa han-ay sa gitibuok sa tandem ni Robredo-Pangilinan. Gilakip na hinuon sa han-ay niini silang Juan Miguel Zubiri, Joel Villanueva ug Richard Gordon, mga senador nga adunay taas nga rekord sa pakigtinabangay kang Duterte.

Samtang, gilakip sa tandem ni Pacquiao-Atienza pareho si Colmenares ug Elmer Labog, lider sa Kilusang Mayo Uno, sa ilang han-ay sa mga kandidato pagkasenador. Giendorso usab sila sa grupong Lakas ng Masa nga naghaon usab sa pagkandidato isip presidente ug bise presidente.