World Hunger Day. Nagprotesta ang mga aktibistang mag-uuma niadtong Oktubre 16 atubangan sa Mega Q-Mart sa Quezon City isip pagdumdum sa World Food Day nga ilang gitawag og World Hunger Day (Adlaw sa Kagutom). Gihagit nila ang mga kandidato sa eleksyong 2022 nga himuong kabahin sa ilang adyenda ang paglatag sa “kongkretong solusyon sa dugay nang krisis sa pagkaon ug sektor sa agrikultura, nga angayang nakasubay sa prinsipyo sa ekonomikanhong kagawasan ug pagsalig sa kaugalingon.”

Ihunong ang proyektong reklamasyon sa Cebu. Naglunsad og protestang parada sa dagat ang mga magdadagat ug mag-uuma sa Calajoan, Minglanilla, Cebu niadtong Oktubre 15 aron ipahunong ang operasyon sa kwari ug planong reklamasyon sa lugar. Gikundena nila ang pag-apruba sa lokal nga gubyerno sa 100-ektaryang proyektong reklamasyon nga Ming-Mori. Nabalaka sila sa mamahimong epekto niini sa kinaiyahan ug sa ilang panginabuhian. Ingonman, gitaho nila ang padayon nga operasyon sa kwari sa kabukiran sa Minglanilla.

Protesta sa mga elektrisyan. Nagprotesta niadtong Oktubre 11 atubangan sa upisina sa Department of Labor and Employment ang mga mamumuo sa Hypervolt Contractor Corporation aron kundenahon ang nalangan ug iligal nga mga kaltas sa ilang suhulan ug kawalay benepisyo sa kumpanya. Ang Hypervolt usa ka kontraktor sa mga elektrisyan nga nagadumala sa pagkab-it ug pag-ayo sa linya sa kuryente.

Ayuda, bakuna dili demolisyon. Nagtapok ang Kadamay niadtong Oktubre 9 atubangan sa Department of the Interior and Local Government sa Quezon City aron iduso ang “zero demolition” o pagpahunong sa tanang demolisyon ilabina sa panahon nga mayorya nag-antus tungod sa pandemya ug krisis sa ekonomiya. Gitaho nilang adunay 50,000 ka kabus ang posibleng mawad-an og puluy-anan sa Metro Manila tungod sa hulga sa demolisyon.

Kadaugan sa kooperatiba sa kuryente sa Benguet. Malampuson nga napalagpot sa mga empleyado sa Benguet Electric Cooperative ang itoy sa Malacañang nga si Ana Marie Rafael nga pugos nga gibutang sa National Electrification Authority isip pangkinatibuk-ang manedyer niadto pang Hulyo 29. Napalagpot si Rafael human ang mga protesta nga gilunsad sa mga empleyado sa Baguio City nga gisalmutan sa gatusan ka tawo.