Komunidad sa Cagayan, ginbomba sang militar

,
Ang artikulo nga ini may salhin sa PilipinoEnglishBisaya

Pagpamomba malapit sa mga sibilyan nga komunidad sa Cagayan, iligal nga mga pag-aresto kag pagpang-ipit sa mga mangunguma kag iban pang sibilyan ang nareport sang Ang Bayan sa nagligad nga semana.

Naghulog ang AFP sang 30 bomba sa apat ka hugnat halin alas-3 sang aga sang Enero 29 sa Barangay Sta. Clara, Gonzaga, Cagayan, bisan wala naman sang yunit sang BHB sa lugar. Ginsundan ini sang pag-istraping nga naglawig sang pila ka oras. Bangud diri, napilitan nga magbakwit ang 66 pamilya, kadam-an mga tumandok nga Agta.

Sa Sorsogon, gin-aresto sang 31st IB kag mga pulis si Ruben Estremadura sa Barangay Sta. Barbara, Bulusan sang Enero 12. Si Renaldo Gaan gin-aresto sang Enero 28 sa P4, Barangay Mahaba, Cabadbaran City, Agusan del Norte. Pareho sila nga ginapasibangdan nga myembro sang hangaway sang banwa.

Sa Quezon, ginbuyagyag sang Gabriela-Southern Tagalog sang Enero 21 ang pagpanglugos sang isa ka suldado kay “Belle,” isa ka 15-anyos nga bata nga babaye. Gindukot si Belle sang mga suldado sang 59th IB kag gindetenir halin Hulyo 27 tubtob Agosto 13 sang 2020. Ginpilit siya nga paakuon nga myembro sang BHB ang iya iloy nga isa ka aktibista nga nagapakigbato para ibalik sa mga manugniyog ang pondo nga coco levy. Nagdesider ang pamilya nga ipaabot ang kaso sa Gabriela bangud sa wala untat nga pagpang-ipit sa ila sang AFP.

Sa Bulacan, ginpalukpan sang Enero 29 sang mga armadong maton ni Gregorio Araneta III, bayaw ni Ferdinand Marcos Jr., ang mga katapu sang mga organisasyon nga mangunguma nga nagahimo sang imbestigasyon sa iligal nga pagdemolis sa Lupang Teresa, Barangay San Roque, San Jose del Monte. Ginkawat pa sang mga maton ang mga gamit kag dala nga relief goods sang mga manug-imbestigar. Apat ka balay kag mga pananom ang gindemolis sang Enero 26.

Komunidad sa Cagayan, ginbomba sang militar