Protesta kontra sa Kaliwa Dam. Nagrali sang Enero 31 sa atubang sang upisina sang Metropolitan Waterworks and Sewerage System sa Quezon City ang mga tumandok kag grupo nga pabor sa kapalibutan nga nadalasa sang proyekto nga Kaliwa Dam. Ginkundenar nila ang pagdali-dali sa proyekto sa pihak sang lapnagon nga pagpamatuk sang mga residente diri. Ginpakamalaut nila ang paltik nga konsultasyon sang Enero 25 kon sa diin nagmaniobra ang rehimen para pwersahon ang mga lider nga tumandok nga magpirma sa isa ka memorandum of agreement.

2-adlaw nga welga sang mga manugtinda. Naghiwat sang 2-adlaw nga welga sang Enero 24 kag 25 ang mga manugtinda sa Carbon Market sa Cebu City para ipanawagan sa lokal nga gubyerno nga untaton ang pribatisasyon sang merkado.

Pagdumdom sa ika-35 anibersaryo sang Masaker sa Mendiola. Gindumdom sa mga paghulag sa Cavite, Iloilo City kag Bacolod City ang ika-35 anibersaryo sang masaker sang mga pwersa sang estado sa nagarali nga mga mangunguma sa Mendiola sa Maynila sang Enero 22. Sa Cavite, nagkadto ang mga raliyista sa Patungan, Maragondon.

Masaker sa Guinyangan, gindumdom. Nagrali sa atubang sang upisina sang Commission on Human Rights sa Quezon City ang mga grupo halin sa Southern Tagalog sang Pebrero 2 bilang pagdumdom sa kalakasan sang mga pwersa sang estado sa rali sang 6,000 mangunguma sa Guinyangan, Quezon sang Pebrero 1, 1981. Duha ang napatay kag halos 100 ang napilasan sa insidente nga ini.