Nagdeklarar sang suporta ang Koalisyong Makabayan sa magpartner Leni Robredo-Francis “Kiko” Pangilinan bilang mga kandidato sa pagka-presidente kag bise presidente sang pungsod. Ini pagkatapos sang pormal nga pag-endorso sang 1Sambayan sang Enero 28 sa kandidatura sa pagka-senador ni Atty. Neri Colmenares sang Makabayan sa maabot nga eleksyon sa Mayo 2022.

Ang 1Sambayan natukod sang Marso 2021 bilang koalisyon sang mga organisasyon kag indibidwal nga batuk sa pagginahum ni Rodrigo Duterte nga nagaisa sa katuyuan nga lutuson ang iya hubon sa 2022. Ginasuportahan sang 1Sambayan ang kandidatura ni Vice Pres. Robredo sa pagkapangulo.

Ang pagsuporta sang Makabayan sa magpartner Leni-Kiko “malahalon nga pagsulong sa paghugpong sang tanan nga demokratikong pwersa para lutuson ang mga Marcos kag Duterte,” suno naman kay Renato Reyes, pangkabilugan nga sekretaryo sang Bayan.

Ginasimbolo sini ang paghiliusa sang pagbato sang nagkalainlain nga grupo kag sektor sa tuyo sang mga Marcos kag Duterte nga manumbalik sa Malacañang. Sa tantya sang Makabayan, si Robredo ang may pinakatsansa nga paslawon ang magpartner Marcos-Duterte.

Mga komun nga tindog sa isyu

Sa pahayag sa midya sang Enero 29, ginsaysay sang Makabayan ang basehan kag kundisyon sang pag-endorso sa magpartner Leni-Kiko. Siling nila, “ang mga komun nga tindog sa isyu, ang track record sang mga kandidato kag ang tuman ka malahalon nga pagbato nga paslawon ang magpartner Marcos-Duterte.”

Lakip sa mga komun nga tindog ang pagpatuman sang siyentipiko kag makatawo nga pagsabat sa pandemya, ang pagpasulong sang kinamatarung sang mga mamumugon kag pagbato sa kontraktwalisasyon kag kinamatarung sang mga mangunguma sa duta. Komun man sa duha ka bahin ang pagtindog sang magpartner batuk sa paglapas sa tawhanong kinamatarung, ang ila panindugan para sa pungsodnon nga soberanya kag kinamatarung sa West Philippine Sea.

Suportado man nila ang handum sang magpartner nga repasuhon ang mga kaso sang mga bilanggong pulitikal nga mga tigulang kag may balatian agud mahilway sa basehan nga makatawo. May pareho man sila nga panindugan nga ibalik ang prangkisa sang ABS-CBN. Komun man ang pag-amlig sa kapalibutan, tumandok, mangunguma kag mangingisda nga Pilipino paagi sa pagrebyu kag pagrebisa sang mga polisiya kag layi sa pagmina. May pagsanto man sa panindugan nga irebyu ang pagsira kag liwat nga akreditasyon sang mga eskwelahang Lumad. Promisa naman ni Robredo nga repasuhon niya ang istruktura kag lakip ang mga gawi sang NTF-Elcac sa atubang sang panawagan sang Makabayan nga bungkagon ini.

Nagkasugot ang duha ka bahin nga isulong ang sugilanon pangkalinungan kag pagpasabat sa mga mataas nga upisyal sang gubyerno nga imbolbado sa mga paglapas sa tawhanong kinamatarung kag pagpandambong kag pagpahanugot sa International Criminal Court para bistahon si Duterte kag iban nga kahimbon niya. Ginaduso man nila ang mga repormang elektoral kag pulitikal agud batuan ang pag-abuso sa gahum kag mahatagan sang partisipasyon kag tingog ang pumuluyo.