Duha ka batalyon ang subong nagasakop sa isla sang Masbate (populasyon: 908,920) sa desperado nga tuyo nga piguson ang mga pagbato sang pumuluyo kag lutuson ang Bagong Hukbong Bayan (BHB) sa isla. Sining Pebrero, nareport nga kumpleto na ang pagsaylo sang 96th IB sa isla halin sa Camarines Norte. Katumbas na sini ang 6.6 suldado kada 10,000 katawo sa isla kontra sa 2.7 mamumugon sa ikaayong lawas kada 10,000 katawo sa nagligad nga mga tuig.

Ginasiling nga ginpadala ang 96th IB para masakop ang 300 barangay sa sila nga kuno mga “hotspot” sa eleksyon. Ang matuod, tuyo sini nga labi pa nga hugton ang paghari-harian sang militar sa madamo nga lugar sa isla. Antes sini, ang batalyon nga ini nakadeploy sa Camarines Norte.

May maduguon nga rekord ang 96th IB sang ara pa ini sa idalom sang 902nd IBde nga nagasakop sa Camarines Norte kag pila ka banwa sa Camarines Sur. Tatlo ka mangunguma ang gintortyur, ginpatay kag ginlubong sa manabaw nga kutkot sa Ragay, Camarines Sur sang Mayo 2018. Isa ka mag-amay ang ginpatay sang mga tropa sini sa Labo, Camarines Norte sang Marso 2020.

Sa pagsaylo sang batalyon sa Masbate, sigurado nga magalala pa ang mga paglapas sa tawhanong kinamatarung sa prubinsya. Suno sa datos sang National Democratic Front-Bicol, 74 sa 229 biktima sang ekstrahudisyal nga pagpatay halin 2016 tubtob Enero 2022 nalista sa Masbate. Ini ang pinakadaku nga numero sa rehiyon.

Dugang perwisyo sa masa nga Masbatenyo ang 2nd IB, isa ka hubon sang 31st IB, ang 93rd Civil Military Operations Company, isa ka kumpanya sang military intelligence, kag mas o menos tatlo ka batalyon nga pwersa sang pulis.