Isa ka duktor, duha ka pamatan-on nga aktibista kag tatlo ka mangunguma ang iligal nga gin-aresto sang mga suldado kag pulis sa nagligad nga pila ka adlaw.

Sang Pebrero 18, gin-aresto sang mga pulis si Dra. Ma. Natividad Castro sa balay sang iya utod sa San Juan City. Si Dra. Castro kabahin sa mga mamumugon sa ikaayong lawas nga nagbulig sa pagtukod sang mga community health center kag mga programa sa ikaayong lawas sa rehiyon sang Caraga sa Mindanao. Madugay man siya nga nag-alagad bilang pangkabilugan nga sekretaryo sang Karapatan-Caraga.

Ginpasakaan si Dra. Castro sang himu-himo nga kaso nga kidnapping kag illegal detention kag gindalahig sa opensiba sang Bagong Hukbong Bayan sa Sibagat, Agusan del Sur sang Disyembre 29, 2018. Kabahin ang pag-aresto sa iya sa wala-untat nga pagpang-atake sa mga tagapangapin sa tawhanong kinamatarung kag kinamatarung sang mga Lumad sa Mindanao agud paludhon ang pumuluyo sa isla kag tugahon ang ilusyon nga balwarte ini sang pamilya Duterte.

Bicol. Sang Pebrero 13, gin-aresto sang mga pulis si Allen Omanad, estudyante sang Catanduanes State University kag residente sang Viga, Catanduanes, pagkatapos gintamnan sang kalibre .38 nga pusil kag mga bala ang iya balay. Suno sa ginikanan ni Omanad, ginsulod ang ila balay sang tatlo ka lalaki kag gintanom ang isa ka pistola pila ka minuto lang antes mag-abot ang mga nang-aresto nga pulis. Ginlagas pa ni Omanad ang mga nagsulod pero wala na niya maabtan.

Gin-aresto sang Enero 21 sang 31st IB si Nora Garote, residente kag kagawad sang Barangay Sta. Lourdes, Sorsogon. Sa Legazpi, Albay, gindakup si Maricel Morilla sang Enero 20 kag ginlamita sa ambus sang hangaway sang banwa batuk sa mga elemento sang 31st IB sa Barangay Banquerohan sang 2020.

Nakaagi man sang kalakasan ang municipal coordinator sang Anakpawis Partylist nga si Edwin Romero kag isa ka katapu sang Kabataan Partylist sang Pebrero 9 samtang nagahulat sa Alice Bridge, Sorsogon City.

Samtang sa Masbate, gindukot kag ginpatay sang PNP-Masbate kag 96th IB si Richard Mendoza, residente sang Esperanza, sang Pebrero 8 kag ginpagwa nga BHB nga napatay sa peke nga engkwentro.

Negros Occidental. Iligal nga gin-aresto si Harlyn Balora, katapu sang Anakbayan-Negros sang Pebrero 19 sa Sityo Montara, Barangay Camang-Camang, Isabela kon sa diin siya nagapuyo. Ginsalakay man sang 500-katawo nga PNP kag AFP ang mga balay sa lugar. Nakadetenir subong si Balora sa Isabela Police Station.

Samtang, ginpahug, gin-ipit kag ginpaidalom sang mga suldado sa interogasyon ang mga residente sang Barangay Bi-ao, Binalbagan. Ini pagkatapos sila ginbunalan sang mga Pulang hangaway sang Pebrero 13. Ginsulod sang mga suldado ang isa ka balay kag ginguba ang motorsiklo nga nakaparada diri. Samtang, isa ka 15-anyos nga bata nga lalaki ang napilasan sa pataratas nga pagpangluthang sang mga pulis nga natarantar sang ambuson sila sang Pulang hangaway.

Rizal. Ginpaulanan sang bala sang mga gwardya sang JMV Security Services ang mga residente sang Sityo Avatex, Barangay San Jose, Rodriguez, Rizal sang Pebrero 16 sang aga. Malubha nga napilasan sa insidente ang isa ka residente bangud sa pagpangluthang.

Instrumento ang mga gwardya nga ini sa pagpalayas sa mga residente sa 148 ektarya nga kadutaan nga ginaangkon sang JVH Real Property and Leasing.