Dugay nang napamatud-an kung paunsa labing nakasandig ang lokal nga ekonomiya sa pondong naggikan sa mga remitans sa mga migranteng mamumuo. Mas mitataw kini panahon sa pandemya, kung asa ang ginapadala nilang kwarta sa mga paryente nila sa Pilipinas ang nagpasugakod sa minilyong nawad-an og trabaho ug panginabuhian.

Niadtong 2020, mikabat sa $29.903 bilyon (₱1.49 trilyon) ang misulod nga remitans sa nasud—mas daku kumpara sa laing tinubdan sa langyawng kapital sama sa langyawng pamuhunang kapital, rebenyu gikan sa turismo ug mga call center. Sukad 2000, ang remitans ang naglangkub sa kapinkun-kulang 10% sa gross domestic product sa Pilipinas.

Nakibhangan lamang og 0.8% ang kinatibuk-ang remitans nga gipadala sa mga migranteng Pilipino atol sa pandemya niadtong 2020. Kini bisan og kapin 600,000 ang nawad-an og trabaho ug minilyon pang Pilipino ang temporaryong nawad-an og trabaho tungood sa mga restriksyon. Aron padayon nga makapadala, labaw pang pag-inot ang ilang gihimo. Sa US, gibanabanang bisan ang ayudang gipanghatang ngadto kanila sa gubyerno ilang ginapadala sa Pilipinas. Niadtong 2021, midaku ngadto sa ₱34 bilyon ang kinatibuk-ang remitans nga misulod sa nasud.


Pagkibhang sa remitans

Hilabihan na gani ang mga sakripisyo, dugang paantus pa sa mga migranteng Pilipino ang taas kaayong “remittance cost” o kibhang sa mga bangko ug institusyong ginadaluyan sa ilang remitans. Lakip sa pinakadaku ang ginahakop nga tubo mao ang mga bangkong Amerikano kung asa nagaagi ang 40% sa mga remitans.

Sa taho sa Asian Development Bank niadtong Pebrero, mikabat sa 8.8% o $17.6 (₱915.20) sa bayloay nga $1=₱52) ang abereyds nga ginakibhang sa mga kumpanya sa money transfer sa matag $200 (₱10,400) nga ginapadala sa mga migranteng Pilipino. Mas taas kini kumpara sa pangkalibutang abereyds nga 6.4% ug 5.9% sa mga rehiyon sa Asia ug Pacific. Abereyds nga $300-$500 kada bulan o kapin katunga sa ilang suhol ang ginapadala sa mayorya sa mga migranteng Pilipino.

Samtang, mikabot sa 10% o sobra pa ang ginakibhang sa mga bangko sa ilang mga serbisyong pinansyal (pareho sa pisikal nga bangko ug mobile banking gamit ang internet). Wala pay labot dinhi ang mga “nakatagong balayrunon” nga arbitraryong ginapataw sa mga bangko ug institusyon. Usa dinhi ang ginasingil kung nausab ang foreign exchange rate (o tantos sa bayloay sa kwarta) nga ginatakda sa ispekulasyon sa merkado.

Mayorya sa mga remitans (70% sa pangkalibutang langkub) mao ang cash-to-cash kung asa ginadeposito sa laing nasud ug ginakuha sa bangko sa pormang cash sa lokal nga kwarta. Pinakaubos ang ihap sa nagagamit og “mobile money” o pagpadala og remitans gamit ang selpon sama sa GCash tungod sa limitadong imprastruktura ug kahibalo. Kini bisan ang maong pamaagi ang may pinakabarato ang singil kada transaksyon.

Sa minimum, mikabat sa $2.56 bilyon (₱135.2 bilyon) ang nahakop sa mga bangko ug institusyon atol sa pandemya niadtong 2020. Mas daku kini sa ₱100 bilyong ayuda sa rehimeng Duterte sa susamang tuig.


Remitans isip negosyo

Lakip sa kumpanyang nakaginansya sa remitans sa mga migranteng mamumuo ang mga kumpanyang Amerikanong Western Union ug MoneyGram. Sa Pilipinas, numero unong daluyan sa remitans ang Philippine National Bank nga gipanag-iyahan ni Lucio Tan ug Banco de Oro sa pamilyang Sy.

Niadtong 2017, misalmot ang rehimeng Duterte sa negosyo sa remitans dihang gitukod niini ang Overseas Filipino Bank (OFBank) pinaagi sa Executive Order 44. Gitawag kining “bankpira” ug “bag-ong raket sa estado” sa grupong Migrante International tungod kay matud nila “pagasupsupon” niini ang mga remitans sa mga migrante. Gawas sa pagpadala og remitans sa mga pamilya, nagtanyag kining mahimong daluyan sa mga balayrunon sa estado sama sa Social Service System, OWWA, PhilHealth, Pag-ibig ug uban pa bugti sa singil kada transaksyon.

Bisan pa man, gibabagan sa mga migrante ang OFBank tungod kay ginapakusog niini ang palisiyang pag-eksport sa kusog-pamuo sa mga mamumuong Pilipino. Matud nila, wala niini ginatubag ang ugat sa pugos nga migrasyon. “Ang nag-unang tumong niini mao ang pagpadali ug pagpahugot sa sistema sa paghuthot sa kita gikan sa gihaguang suhol sa mga migranteng Pilipino,” matud sa grupo.