Upat ka aktibista ug organisador ang gidagit sa armadong pwersa sa estado niadtong Mayo ug Hunyo matud sa taho sa Kilusang Mayo Uno ug Gabriela niining Hulyo. Dugang pa, gidagit sa 94th IB ang magtiayong mag-uuma sa Himamaylan City niining bulana.

Wala pa gihapon nakita ang mga biktima nga silang Elizabeth “Loi” Magbanua ug Alipio “Ador” Juat, parehong organisador sa mga mamumuo nga nawala gikan pa niadtong Mayo 3. Ulahi silang nakita sa Barangay Punturin, Valenzuela City human mitambong sa usa ka miting. Ingonman, wala pa gipakita silang Elgene Mungcal sa Gabriela Women’s Partylist ug Ma. Elena “Cha” Cortez Pampoza sa Anakpawis nga gidagit niadtong Hulyo 3. Ulahi silang nakita sa Winfare Supermarket, Moncada, Tarlac.

Sa Negros Occidental, gidagit sa 94th IB ang magtiayong mag-uuma nga silang Gerald Ganti ug Dalen Alipo-on, mga myembro sa Mahalang Farmer’s Association, sa Sityo Mambalayong, Barangay Mahalang, Himamaylan City niadtong Hulyo 15. Pugos nga gisulod ug giransak sa mga sundalo ang balay sa magtiayon.

Pagpatay. Napatay sa paturagas nga pagpamusil sa 62nd IB ang mag-uumang si Pompeo Landisa sa Sityo Catuptop, Barangay Trinidad, Guihulngan City, Negros Oriental niadtong Hulyo 20. Ginapagawas nga engkwentro ang nahitabo sa lugar.

Pag-aresto. Giaresto sa lokal nga pulis si Gary Campos, usa ka magtutudlong Lumad-Manobo, sa Tandag City, Surigao del Sur niadtong Hulyo 17. Gidagit siya sa mga pulis samtang nagbyahe ug gipriso sa Butuan City Police Station. Myembro si Campos sa organisasyong Lumad nga nanalipud sa Andap Valley Complex batok sa pagpangawkaw.

Sa parehong adlaw, iligal nga giaresto sa mga pulis sa gama-gamang kaso si Charlie Saliganan, usa ka sibilyan, sa Barangay Poblacion, Sta. Catalina, Negros Oriental.

Samtang, giaresto si Ramonito Mahinay sa gama-gamang kasong illegal possession of firearms niadtong Hulyo 9 sa Sityo Kamanggahan, Barangay Tabon, Vallehermoso.

Niadtong Hulyo 6, giaresto sa 79th IB ang usa ka sibilyan sa Sityo Banwa Minatay, Barangay Marcelo, Calatrava, Negros Occidental. Ayha niini, gipaulanan og bala sa mga sundalo ang mga balay sa sityo nga nakasamad sa usa ka bata.

Sa Oriental Mindoro, lima ka sibilyan ang iligal nga giaresto sa mga pulis sa Sityo Nara, Barangay Villa Pag-asa, Bansud niadtong Hulyo 5 sa gama-gamang mga kaso. Naila ang mga biktima nga silang Joel Raña Manis, Abegail Buendicho ug ang magtiayong Ricky ug Sarah Hatulan, ug usa pa ka wala nganli. Giakusahan silang mga myembro sa BHB.

Pagpamig-ot. Giharas sa mga sundalo sa 542nd Engineering Battalion ang pamilyang Mijares nga nagsak-anan sa Sityo Lagtapon, Barangay San Antonio, Himamaylan City niadtong Hulyo 14. Una nang gisulayan og dagit sa parehong yunit ang 3-anyos nga batang Mijares niadtong Hunyo 24.

Samtang, niadtong Hulyo 15, gipig-ot ug wala gitugutang maka-enrol sa University of Makati sa administrasyon sa unibersidad si Althea Beatrice Papa, nasudnong upisyal sa Kabataan Partylist. Giakusahan siya ug ang KPL isip mga “terorista.”