Magkasunod nga demolisyon ang gipahigayon sa mga ginsakpan sa lokal nga gubyerno sa Cebu City sa 80 ka tindahan sa Unit II sa Carbon Public Market niadtong Hulyo 15 ug 18. Kalambigit kini sa pagahimuong pribatisasyon sa maong merkado nga gidumalahan sa Mega-wide Construction Corporation, katimbayayong ang lokal nga gubyerno.

Matud sa grupong Carbonhanong Alyansa alang sa Reporma ug Bahandianong Ogma sa mga Nanginabuhi (CARBON), mosaka ang abang sa pwesto tungod sa pribatisasyon ug mamahimong eksklusibo sa pipila ka manindahay.

Gipadayon ang demolisyon luyo sa barikada nga gitukod sa mga mamaligyaay ug ilang mga tigsuporta.

Gibanabanang 12,000 ka mamaligyaay ug trabahador ang mawad-an og pwesto. Dugang dinhi, gibanabanang 700 ka kabalayan ang idemolis sa kasikbit nga Sityo Bato, Barangay Ermita nga langkub sa konstruksyon sa bag-ong mga imprastruktura.