Sunud-sunod nga kaso sa paglapas sa tawhanong katungod sa mga mag-uuma ang nataho sa milabayng mga semana. Nag-unang nalambigit sa maong mga krimen ang mga yunit sa Armed Forces of the Philippines (AFP) nga gapangatake sa mga sibilyang komunidad nga lapas sa internasyunal nga makitawhanong balaod.

Sa Albay, gipatay sa mga pwersa sa estado ang mag-uumang si Vernon Bonggat niadtong Pebrero 20 sa iyang balay sa Barangay Tablon, Oas. Ang pagpatay kaniya gituuhang pagpanimalos sa pwersa sa estado human mapakyas ang 49th IB batok sa Bagong Hukbong Bayan (BHB) niadtong Pebrero 15 sa Barangay Ramay.

Pugos nga gisulod sa duha ka ahente sa militar ang iyang balay sa alas-8:30 sa gabii ayha siya gidayunan pagpatay. Ang balay ni Bonggat usa ka kilometro lamang ang gilay-on gikan sa usa ka seksyon sa 49th IB nga nag-operasyon sa lugar.

Sa Negros Occidental, naguba ang balay sa mga mag-uuma nga silang Albascion Onopre ug Rhoda Garnica sa Sityo Cabagnaan, Barangay Carabalan, Himamaylan City human paulanan og bala sa mga sundalo sa 94th IB niadtong Marso 1. Matud sa taho, nagpabuto ang mga sundalo human ang nabalitang engkwentro tali sa 94th IB ug yunit sa BHB sa usa ka dapit sa sityo.

Nagdagana ang mga residente sa grabeng kahadlok. Tungod sa kabangis, kapin 100 ka pamilya ang mibakwit padulong sa sentro sa barangay gikan sa mga sityo sa Panagbaan, Florete, Cabalungan, ug Daat. Ginakontrol ug ginabantayan usab sa militar ang lihok sa mga anaa sa sentro sa ebakwasyon. Hinayhinay na silang nakabalik sa kasamtangan.

Samtang, gikulata sa tropa sa 62nd IB ang mag-uumang si Lindon Mata sa Sityo Bantolinao, Barangay Santol, Binalbagan niadtong Pebrero 23. Sa Barangay Amuntay usab niadtong Pebrero 14, gisulod sa 62nd IB ang balay ni Jelman Lindayao kung asa kauban niya ang iyang asawa ug mga anak. Samtang kaestorya sa mga sundalo ug nag-atubang sa iyang mga anak, gitiunan og sundang ang liog ni Jelman.

Sa Bukidnon, giransak sa mga sundalo ang balay ni Nerisa Lumayag sa Sityo Gabonan, Barangay Dumalaguing, Impasug-ong, niadtong Enero 29. Kuyog niya niadtong tungura ang iyang asawa ug mga anak dihang gisulod sa mga sundalo ang balay. Nagbunga og grabeng kadaut sa pamilya ilabina sa mga bata ang maong teroristang pagpamig-ot sa mga sundalo. Giakusahan ang pamilya nga nagatabang ug nagahatud og suplay sa BHB.

Sa Abra, gitaho ang pagpamig-ot ug pag-sukitsukit sa mga ahente sa militar kang Jerome Agaid, usa ka mag-uuma nga myembro sa Lupong Tagapamayapa sa tribung Mabaca nga nanimuyo sa Mataragan, Malibcong. Kauban ni Agaid niadtong Pebrero 16 ang iyang 5-anyos nga anak nga nangisda sa Barangay Gadani, Tayum dihang gihadlok ug gidakop sa mga sundalo.

Pugos nga “ginapasurender” sa 24th IB si Agaid ug gipugos nga luiban ang iyang kaugalingong tribu. Matud sa taho, gipahimuslan sa militar ang pagkaospital sa iyang asawa aron “kumbinsihon” si Agaid nga mokooperar kanila. Matud sa mga sundalo, pagabayran niini ang pagpatambal sa asawa kung mosunod sa mando sa militar.