Sunud-sunod ang gihimong mga protesta sa mga demokratikong organisasyon sa Metro Manila ug sa ubang bahin sa nasud sa miaging duha ka semana.

Isalikway ang Marcos cha-cha. Nagprotesta ang lain-laing sektor atubangan sa Kongreso niadtong Marso 6 aron ipaabot ang ilang pagbabag sa pagsulay nga bag-ohon ang Konstitusyong 1987. Giratsada sa mga alipures ni Marcos Jr ang sugyot balaudnon alang sa pagtukod og Constitutional Convention aron bag-ohon ang konstitusyon sa ulahing bahin sa tuig. Laraw ni Marcos nga tangtangon ang mga probisyon kalabot sa limitasyon sa langyawng pagpanag-iya ug pagpamuhunan sa ekonomiya, ingonman ang mga limitasyon sa termino sa nasudnon ug lokal nga mga upisyal.

EDSA37. Kapin 2,000 ang nagtapok atubangan sa People’s Power Monument niadtong Pebrero 25 para dumdumon ang ika-37 nga anibersaryo sa Panag-alsang EDSA nga nagpalagpot sa diktador nga si Ferdinand Marcos Sr ug iyang pamilya. Kini ang unang anibersaryo sa panag-alsa kung asa nakabalik na ang mga Marcos sa poder. Adunay susamang protesta sa mga syudad sa Baguio, Bacolod ug Iloilo.

Hustisya sa New Bataan 5. Gidumdum sa kabatan-onon ang unang anibersaryo sa pagmasaker sa 1001st IBde kang Chad Booc, Gelejurain Ngujo II, Elegyn Balonga, Tirso Añar ug Robert Aragon sa Andap, New Bataan, Davao de Oro niadtong Pebrero 24. Gipanawagan nila ang pagpanubag sa mga yunit militar nga naghimo sa krimen.

Subling ablihan ang CADP. Sa Batangas, nagrali ang mga mamumuo sa katubhan nga myembro sa Batangas Labor Union ug Central Azucarera Don Pedro Professional Technical Monthly Paid Workers Union Inc. Nagtapok sila atubangan sa galingan sa Central Azucarera Don Pedro sa Nasugbu aron batukan ang pagpamig-ot sa ilang mga unyon ug ipanawagan ang subling pag-abli sa CADP.

Ibasura ang Herrera Law! Midagsang sa upisina sa Commission on Human Rights niadtong Marso 2 ang mga grupo sa mamumuo aron ipanawagan ang pagbasura sa 34-ka-tuig na nga Herrera Law. Kini ang nag-unang hinungdan sa pagkaylap sa kontraktwalisasyon ug pagpig-ot sa katungod sa mga mamumuo nga magwelga ug mag-unyon.

Piket ug protesta sa kababayen-an. Gisugdan niadtong Pebrero 27 atubangan sa SM North sa Quezon City ug atubangan sa Iloilo Provincial Capitol ang serye sa mga piket ug protesta sa Gabriela alang sa National Women’s Month.

Niadtong Marso 3, midagsang sa Mendiola ang kabatan-onang kababayen-an aron ipadangat ang ilang pagbabag sa EDCA ug MROTC.

Niadtong Marso 4, nagtapok ang mga kababayen-an sa Plaza Rajah Sulayman, Maynila sa pagpanguna sa Lila Pilipina aron babagan ang US-Japan-Philippines Security Triad, kadungan sa panawagan sa hustisya alang sa Filipino comfort women niadtong Ikaduhang Gubat sa Kalibutan.

Panubagon ang mga imperyalista sa climate crisis. Naglunsad og protesta ang Youth Advocates for Climate Action Philippines atubangan sa usa ka hotel sa Makati City niadtong Marso 2 kadungan sa tigum sa usa ka komite sa United Nations aron singlon ang mga kapitalistang nasud nga nag-unang tinubdan sa greenhouse gases nga hinungdan sa climate crisis. Dapat kunong bayaran sa maong mga nasud ang kadaut ug kantidad nga nawala tungod sa mga katalagmang nagresulta sa climate change.
Niadtong Marso 3, midagsang usab sa DENR ang mga aktibista aron dumdumon ang ika-28 nga tuig sa magun-ubong Philippine Mining Act ug makigduyog sa Global Climate Strike.

Pagbabag sa demolisyon. Nagpiket ang mga lumulupyo sa Maysapang, Taguig City niadtong Pebrero 22 aron babagan ang planong demolisyon sa ilang komunidad.

Fisheries Code (1998), ibasura! Gimakmak sa mga mangingisda ang upisina sa Bureau of Fisheries and Aquatic Resources sa Quezon City niadtong Pebrero 24 aron iduso ang pagpabasura sa madaugdaugong Philippine Fisheries Code of 1998 sa ika-25 nga anibersaryo niini. Gawas niini, gipapahunong nila ang pagkalot sa yuta o dredging ug mga proyektong reklamasyon sa Manila Bay nga makadaut sa kinaiyahan ug panginabuhian sa gagmayng mangingisda.

Layas militar! Napalayas niadtong Pebrero 21 sa mga ginikanan ug magtutudlo sa Mataragan National Agricultural School sa Barangay Mataragan, Malibcong, Abra ang mga sundalong nagkampo sulod mismo sa eskwelahan. Hiniusa silang milihok batok sa hulga niini sa seguridad sa mga bata.