Ibasura ang MIF. Niadtong Mayo 31, gitubag og protesta sa mga progresibong grupo, sa pagpasiugda sa Bagong Alyansang Makabayan, ang pagratsada sa Maharlika Investment Fund sa senado. Gilunsad nila ang protesta atubangan sa Bangko Sentral ng Pilipinas sa Maynila aron babagan ang paggamit sa gipaningkamutang pensyon ug kontribusyon sa mga mamumuo ug empleyado sa maanomalyang MIF.

Planong welga sa Paperland. Nagpadayag og notice of strike (NoS) ang mga mamumuo og Paperland Inc niadtong Mayo 26 human ma-deadlock ang negosasyon alang sa collective bargaining agreement (CBA) niini alang sa tuig 2022-2025. Nagdesisyong magwelga ang mga mamumuo human gidumilian sa maneydsment ang tanang pangayo nga dugang probisyon sa ekonomiya ug pulitika sa ginahimo nga CBA.

Pagbatok sa kwari sa Silay. Nagpiket ang mga mag-uuma sa Silay City niadtong Mayo 19 atubangan sa Provincial Environment Management Office (PEMO) sa Bacolod City aron ipanawagan ang pagpahunong sa mga operasyong kwari sa ilang syudad. Nakigdayalogo usab sila sa mga upisyal sa PEMO nga nagsaad nga mobisita ug paimbestigahan ang kwari.

Ungka, imbestigahan. Nagpiket niadtong Mayo 24 atubangan sa Ungka Flyover ang lain-laing progresibong grupo sa pagpanguna sa Bayan-Panay kauban ang mga mamumuo, sektor sa transportasyon, mga tawong simbahan, ug mga propesyunal aron ipanawagan ang imbestigasyon ug pagpanubag sa mga nagpaluyo sa palpak ug maanomalyang konstruksyon sa kalsada.