Sunud-sunod nga protesta ug aktibidad ang gilunsad sa mga mamumuo sa Wyeth-Nestlé ug ilang mga tigsuporta aron iduso ang pagbalik sa 140 ka mamumuo nga iligal nga gitangtang sa kumpanya niadtong Mayo 18 ug lima pa ka mamumuong una nang gitangtang.

Nagprotesta niadtong Mayo 30 ang mga myembro sa Wyeth Philippines Progressive Workers Union (WPPWU) atubangan sa Nestlé Cabuyao Factory ayha miadto sa Halang, Calamba, Laguna alang sa pagdungog sa National Conciliation and Mediation Board sa Calabarzon. Giatol ang protesta sa ikatulong pagdungog sa “notice of strike” nga gisumite sa unyon. Kauban nila sa protesta ang mga grupo sa kabatan-onan, tawong simbahan, ubang unyon ug mamumuo, pederasyon, sentrong unyon, migrante ug artista. Lakip sa ilang panawagan ang pagpabalik sa trabaho sa mga mamumuong una nang gisisante niadtong Abril.

Samtang, gisumite sa Makabayan Bloc ang House Resolution 1067 niadtong Mayo 31 sa kongreso. Laraw niining imbestigahan ang dili makatarungang “cost cutting ug restructuring strategy” nga ginagamit sa Nestlé aron hatagag rason ang malukpanong pagpanangtang.

Nakaangkon ang unyon sa Wyeth og suporta ug pakighiusa gikan sa mga sama niining unyon sa Nestlé sa Cagayan de Oro City ug Lipa City, Batangas. Niadtong Mayo 26, nagsulat ang maong mga unyon sa Nestlé aron iduso ang pagbalik sa sama nilang mamumuo sa trabaho. Giduso nila sa maneydsment sa Canlubang nga ipatuman ang gipanghinambog sa kumpanya nga palisiya sa abli nga negosasyon ug dayalogo aron protektahan ang mga katungod sa nagatrabaho dinhi.