Napulo ang gipatay, 13 ang iligal nga giaresto ug duha ang gidagit sulod lamang sa duha ka semana nga pagpangatake sa Armed Forces of the Philippines (AFP). Mag-uuma ang siyam sa gipatay ug usa ang samarong Pulang manggugubat.

Sa Camarines Norte, gigapos ug gitortyur ayha gipatay sa 9th IB si Romeo Agua, 42, nga residente sa Barangay San Jose, Panganiban niadtong Mayo 15. Si Agua ang ika-16 nga biktima sa pagpatay sa Bicol sukad nga makalingkod sa pwesto si Ferdinand Marcos Jr.

Sa Negros Oriental, giatake ug giistraping sa 16th Scout Ranger Company ang balay sa pamilyang Babor sa Amumuyong, Barangay Trinidad, Guihulngan City niadtong Mayo 20. Nasamdan dinhi si Antonio Babor, 77, ug anak niyang si Jurielen Babor, 27. Imbes nga tambalan o ipaospital, gipatay sila sa mga sundalo.

Sa susamang adlaw, giatake ug gipaulanan og bala sa 62nd IB ang balay sa pamilyang Ramirez sa Sityo Napiluan, Barangay Quintin Remo, Moises Padilla sa Negros Occidental. Nasamdan sa insidente ang Pulang manggugubat nga si Alvin Bayno (Ka Dagger). Imbes nga dapatan og unang tambal, tinuyo siyang gipatay sa mga sundalo. Kadungan niini gipatay ang mga sibilyang silang Evelyn Meren, Julieven Ramirez—magtiayong tag-iya sa balay—ug ilang katagibaryo nga si Ruben Obidas.

Usa pa ka sibilyan ang gipatay sa 15th IB niadtong Mayo 21 sa Sityo Bajay, Barangay Caliling, Cauayan. Padulong ang mag-uumang si Gusting Mapos sa iyang umahan dihang nasugat ug gipusil siya sa mga sundalo bandang alas-3:30 sa hapon.

Pipila ka adlaw human niini, gidakop sa 15th IB si Jonel Bayno, 27, ug residente sa Barangay Manlucahoc, Sipalay City. Nakita na lang ang iyang patayng lawas sa Crossing Tanduay, Barangay Camindangan niadtong Mayo 25. Gidakop usab sa militar si Rogelio Lacton, residente sa Barangay Camindangan. Nakit-ang patay sa Sityo Sadlum sa maong barangay niadtong Mayo 27.

Sugod Abril 23 pa gilunsad sa 15th IB ang nakapokus nga operasyong militar sa Cauayan ug Sipalay City. Langkub sa mga operasyon ang dili moubos sa 46 ka sityo sa pito ka barangay sa lungsod sa Cauayan, samtang ginautingkay niini ang pito ka sityo sa Barangay Camindangan, Sipalay City.

Pag-aresto. Giatake sa gitapo nga pwersa sa mga pulis ang balay ni Adolfo Salas Sr sa Purok 5, Barangay Tubod, Candijay, Bohol niadtong Mayo 25. Giutingkay ang iyang balay gamit ang usa ka search warrant ug gipagawas nga nakuhaan og pistolang kalibre .45 ug usa ka kalibre .38, daghang bala ug usa ka granada. Kabahin si Salas sa nagtukod sa pangprubinsyang balangay sa Kilusang Magbubukid ng Pilipinas nga Hugpong sa mga Mag-uumang Bol-anon (HUMABOL-KMP).

Niadtong Mayo 14, iligal nga gidakop sa 11th IB ang bag-ong panganak nga si Miralyn Fortunado ug asawa niyang si Rani Casilao sa Barangay Talalak, Santa Catalina, Negros Oriental. Gidala sila sa hedkwarters sa 11th IB sa Barangay Salag, Siaton. Didto, gipugos si Casilao nga “makigtinabangay” ug magsilbing giya sa operasyong kombat sa militar.

Detensyon. Napulo ka residente, lakip ang mga bata ug tigulang ang iligal nga gidetine niadtong Mayo 17 sa Sityo Undol, Barangay Talalak, Santa Catalina, Negros Oriental. Gibawalan sila nga mogawas, magtrabaho sa ilang umahan ug mag-atiman sa ilang mga hayop. Ayha niini, nagpaulan og bala ang mga sundalo sa lugar. Gipunting sa mga sundalo ang ilang kasuko sa mga sibilyan human ang pagkamatay sa duha ka sundalo niadtong Mayo 16 sa usa ka mis-engkwentro tali nila ug sa mga pulis sa maong barangay.

Pagdagit. Gidagit sa mga elemento sa 501st IBde sa AFP silang Cedrick Casaño ug Patricia Nicole Cierva, mga organisador sa mag-uuma ug kabatan-onan, sa Barangay Cabiraoan, Gonzaga, Cagayan niadtong Mayo 18. Human ang kapin tunga sa bulan nga sikretong pagdetine ug sikolohikal nga gitortyur, gipresenta silang mga “misurender nga manggugubat” niadtong Hunyo 2 sa Barangay Bangag, Lal-lo.

Si Cierva kanhing lider-estudyante sa University of the Philippines-Manila ug kanhing upisyal sa mga konseho sa mga estudyante sa tibuok UP system. Si Casaño kanhing estudyante sa Polytechnic University of the Philippines.