Kinundena ng mga grupo sa karapatang-tao ang hatol na maysala ng korte noong Hunyo 29 sa matanda at maysakit na konsultant ng National Democratic Front of the Philippines (NDFP) na si Frank Fernandez, 75, at kanyang asawa na si Cleofe Lagtapon, 69. Ang hatol ay kaugnay sa gawa-gawang kasong illegal possession of firearms.

Ang mag-asawa, kasama si Ge-ann Perez, ay inaresto noong Marso 24, 2019 sa Barangay Calumpang, Liliw, Laguna. Pinalalabas noon na nasamsam sa kanila ang tatlong kalibre .45 pistola, tatlong magasin at mga bala, at tatlong granada.

Sina Fernandez at Lagtapon ay nagpapagamot sa Laguna nang arestuhin. Si Fernandez ay mayroong sakit na chronic artery disease, chronic stable angina, hypertension stage 2-uncontrolled, chronic obstructive pulmonary disease, at hyponatremia, liban pa sa ibang sakit na dulot ng labis na katandaan.

Samantala, ibinalita ng grupong Karapatan na napawalang-sala ang mag-asawa sa mga kaso ng illegal possession of explosives at COMELEC gun ban. Si Perez, na kasama nilang akusado, ay ipinawalang-sala sa lahat ng mga kaso at nakalaya noong Hunyo 30.