Gikundena sa mga grupo sa tawhanong katungod ang hukum sa korte nga sad-an niadtong Hunyo 29 ang tigulang ug masakiton nga konsultant sa National Democratic Front of the Philippines (NDFP) nga si Frank Fernandez, 75, ug iyang asawa nga si Cleofe Lagtapon, 69. Ang hukum adunay kalabotan sa gama-gamang kasong illegal possession of firearms.

Giaresto ang magtiayon, kauban si Ge-ann Perez, niadtong Marso 24, 2019 sa Barangay Calumpang, Liliw, Laguna. Ginapagawas kaniadto nga nakumpiska kanila ang tulo ka kalibre .45 pistola, tulo ka magasin ug mga bala, ug tulo ka granada.

Giaresto si Fernandez ug Lagtapon samtang nagpatambal sa Laguna. Si Fernandez adunay sakit nga chronic artery disease, chronic stable angina, hypertension stage 2-uncontrolled, chronic obstructive pulmonary disease, ug hyponatremia, gawas pa sa ubang sakit nga tungod sa katiguwangon.

Samtang, gibalita sa grupong Karapatan nga dili sad-an ang magtiayon sa mga kasong illegal possession of explosives ug COMELEC gun ban. Si Perez, nga akusado sa maong kaso, nahukmang dili sad-an sa tanang mga kaso ug gibuhian niadtong Hunyo 30.