Panibag-o nga serye sang kaksanay sa Nexperia. Ginkundenar sang Nexperia Workers Philippines Inc. Workers Union (NWPIWU)-NAFLU-KMU ang panibag-o nga serye sang kakasanay nga ginpatuman sang Nexperia Philippines halin Abril tubtob Setyembre. Ginpahibalo sang kumpanya sa unyon sadtong Marso 4 nga may yara sang halos duha ka semana nga shutdown sa isa ka erya sini kag magakakas sang 53 ka mamumugon. Paandam sang kumpanya, una pa lang ini nga serye sang posible nga kaksanay subong nga tuig. Ang lapnagon nga kaksanay nga ginapatuman sang Nexperia ang paglapas sa mga nakahan-ay nga kundisyon sa CBA sini sa unyon. Yara sa negosasyon subong para sa CBA 2024-2026 ang unyon.

Benepisyo sang mga dyanitor sang PUP, ginduso. Nagpiket ang mga dyanitor kag katapo sang Samahan ng Janitorial (SJ), mga katapo sang Anakbayan kag mga estudyante sa Polytechnic University of the Philippines (PUP) sa Santa Mesa, Manila sadtong Marso 13 para iduso ang naatrasar nga mga benepisyo sang mga dyanitor halin sa Starcom Manpower Agency. Gindungan ang protesta sa pagpakigdayalogo sang mga mamumugon sa tiglawas sang ahensya. Sadtong nagligad nga tuig pa una nga ginduso sang mga dyanitor ang ila nga hibubun-ot sa administrasyon sang PUP kag sang ahensya para sa ila nga insentibo, 13th month pay, retroactive pay, kag kawad-on sang transparency sa pagpasweldo sa ila.

Pungsodnon nga Adlaw sang Pagdumdom sa mga Migrante. Nagprotesta ang mga katapo sang Migrante sa Department of Migrant Workers (DMW) sadtong Marso 17 isip kabahin sang ila pagdumdom sa Pungsodnon nga Adlaw sang Pagdumdom sa mga Migrante. Samtang, nagpiket ang mga overseas Filipino workers halin Saudi Arabia para iduso ang ila nga ginpangabudlayan nga sweldo kag benepisyo nga wala pa nabaton halin sang ginsesante sila sadtong 2016 sa nasambit nga pungsod. Sa rekord sang DMW, naglab-ot sa 9,000 ang isip sang nasambit nga mga mamumugon.