Gindunganan sang protesta ang pag-abot ni Anthony Blinken, tiglikom sang Department of State sang US, sa Malacañang sadtong Marso 19. Yara sa pungsod si Blinken para makigsinapol kay Ferdinand Marcos Jr kag sa AFP sa palaabuton nga Balikatan wargames kag para liwat iduso ang Indo-Pacific Security Strategy , ang estrahiya sang US para ipabilin ang hegemonya sini sa Asia batuk sa karibal sini nga China.

Antes si Blinken, halos magkadungan nga nag-abot sa pungsod subong nga Marso ang tag-as nga upisyal sa ekonomya kag militar sang US.

Ginpangunahan ni Gina Raimondo, tiglikom sang Department of Commerce sang US, ang delegasyon sang Presidential Trade and Investment Mission nga ginpadala sang US para ilibod ang Indo-Pacific Economic Framework, isa ka “yabi” nga bahin sang Indo-Pacific Security Strategy. Upod sa delegasyon ni Raimondo ang 22 ka pamunuan sang dalagko nga kumpanyang Amerikano, kabahin ang duha ka kumpanya sa konstruksyon (Bechtel, Black & Veatch) nga tigtukod sang mga baseng nabal kag pasilidad militar sang US sa nagkalain-lain nga pungsod.

Nag-abot man sa Pilipinas si Adm. John C. Aquilino, kumander sang US Indo-Pacific Command, para sa mga sinapol upod sila ni Marcos, tiglikom sang depensa nga si Gilbert Teodoro kag hepe sang AFP nga si Gen. Romeo Brawner Jr, upod ang iban pa nga matag-as nga upisyal sang AFP.

Gintalakay nila ang mga paghanda para sa Balikatan 2024, nga ginapabugal nga mangin “pinakamadako” sa kasaysayan sini. Igalunsar ini sa Batanes kag Palawan halin Abril 22 tubtob Mayo 8. Isa sa mga “highlight” sini ang “integrated air missile defense exercise.” ukon pagpalupad sang mga misayl sa direksyon sang China. Sandig ini sa Strategic Defense Strategy kag papel sang Pilipinas isip pangpaon sa depensang first-island chain sang US.