Pagpasar sang RBH7 sa Kongreso, ginpamatukan. Nagprotesta sa atubang sang Kongreso ang mga demokratiko nga organisasyon sa isa ka People’s Rally sadtong Marso 20 para pamatukan ang pagratsada sang RBH7, ang plano nga nagaduso para sa charter change (chacha). Matapos lang ang pila ka oras sa amo nga adlaw, ginpasa sang Kongreso ang hagna sa boto nga 288 nga nag-uyon, walo nga namatuk kag duha nga abstain. Kabahin sa walo nga namatuk ang mga kongresista sang bloke nga Makabayan. Kadungan sang protesta sa Kongreso, nagprotesta man ang mga estudyante sa Katipunan Avenue, sa atubang sang Ateneo de Manila University.

Epekto sang El Niño, sabton. Nagpiket ang Amihan, pungsodnon nga pederasyon sang kababainhan nga mangunguma, sa upisina sang Department of Agriculture sa Quezon City sadtong Marso 7 para palpagon ang rehimen Marcos sa kawad-on sang aksyon sini sa epekto sang El Niño sa masang mangunguma. Ginaduso nila kay Marcos kag mga ahensya sang estado nga hatagan sila sang hinanali nga alibyo kag bulig, ilabi na ang mga nahalitan ang pananom tungod sa tig-ilinit.

Demolisyon sa Navotas City, ginpamatukan. Nagrali ang mga mangingisda nga katapo sang Pambansang Lakas ng Kilusang Mamamalakaya ng Pilipinas (Pamalakaya) sa baybayon sang Navotas City sadtong Marso 15 para pamatukan ang sugo sang lokal nga gubyerno nga kakson ang mga tahungan kag baklad para hatagan dalan ang Navotas Bay Reclamation Project. Ang 650-ektarya nga reklamasyon ang ginduso sang lokal nga gubyerno kag kahimbon sini nga Argonbay Construction Company, subsidaryo sang San Miguel Corporation nga ginapanag-iyahan ni Ramon Ang. Sa pihak sang pagpamatuk, gintigayon sang mga tinawo sang kumpanya kag sang Coast Guard ang demolisyon sadtong Marso 18.

Adlaw kontra dalagko nga dam, gindumdom. Nagprotesta ang mga grupo sang pungsodnon nga minorya kag tigpangapin sang kinaiyahan sa upisina sang Department of Environment and Natural Resources (DENR) sa Visayas Avenue, Quezon City sadtong Marso 14 para pamatukan ang pagtukod sang dalagko nga dam sa pungsod kag iduso nga hatagan-proteksyon ang mga suba. Ginlunsar ang protesta kadungan sang pagdumdom sa bilog nga kalibutan sang International Day of Action for Rivers and Against Large Dams.

Marcos sa Germany, ginsugata sang protesta. Ginsugata sang protesta sang mga migranteng Pilipino ang pagbisita ni Ferdinand Marcos Jr sa Berlin, Germany sadtong Marso 13. Ginpangunahan sang ALPAS Pilipinas kag Gabriela-Germany ang nasambit nga protesta kag gintambungan sang mga abyan nga German nga mga organisasyon. Hambal nila, ang pagbisita ni Marcos sa Germany kag iban pa nga mga pungsod sa Europe halin Marso 11-15 ang dapat himuon nga okasyon sang tanan nga mga migranteng Pilipino kag mga tigpangapin sang tawhanon nga kinamatarung nga kundenaron ang brutal nga rehimen nga nagsabwag sang malala nga mga paglapas sa tawhanon nga kinamatarung kag international humanitarian law (IHL).

LGBTQIA+ sa EARIST, nanindugan batuk sa diskriminasyon. Nagprotesta ang mga LGBTQIA+ sa pagpanguna sang Bahaghari-EARIST sa kampus sini sa Santa Mesa, Manila sadtong Marso 15 sa atubang sang pagdumili sa mga transwoman nga estudyante nga makapag-enrol mintras indi nagapa-utod sang buhok. Sunod sang protesta, temporaryo nga ginsuspinde sang eskwelahan ang patakaran.