Gin-anunsyo sini nga Marso sang tatlo ka dalagko nga burgesya-kumprador ang ila nga “paghimbon” para sa operasyon sang Ilijan LNG terminal, ang pinakauna nga “integrated LNG import facility” nga gintukod sang Atlantic Gulf & Pacific Company (AG&P) sa baybay sang Barangay Ilijan, Batangas City. Nag-ululupod ang Meralco PowerGen, Aboitiz Power kag San Miguel Global Power (SMGP) para baklon ang nasambit nga pasilidad sa kantidad nga $3.3 bilyon (₱184 bilyon).

Sakop sang Ilijan LNG terminal ang siyam ka ektarya nga kadutaan kag tubtob 700 metro nga katubigan halin sa baybay para sa “nagalutaw nga mga imbakan” sang LNG (liquefied natural gas). Magluwas sa dulungkaan kag imbakan, magaserbe man ini nga pasilidad para sa “regasification” (proseso sang pagtransporma sang LNG halin sa porma nga likido padulong sa orihinal sini nga porma nga gas). Magasuplay ang nasambit nga pasilidad sang natural gas sa ginatukod nga dambuhala nga plantang pang-enerhiya nga ginapanag-iyahan sang San Miguel Corporation (SMC).

Kabahin ang pasilidad kag planta nga ini sa 12 ka “terminal” kag 35 bag-o nga planta pang-enerhiya nga plano tukuron para magsalo sang imported nga LNG kag diesel. Pito sa mga terminal kag walo sa bag-o nga mga planta ang natalana nga tukuron sa baybay sang Batangas, sa atubang sang Verde Island Passage (VIP). Ang iban pa ang plano nga tukuron sa Leyte, Navotas City kag Zamboanga. Isa sa mga planta nga LNG, nga gintuyo tukuron sa baybay sang Tañon Strait sa San Carlos, Negros Occidental, ang temporaryo nga napa-atras sang mga protesta sang mga residente, tawong-simbahan kag mga grupo nga maki-kinaiyahan. Madamo sa mga proyekto nga LNG ang ginaduso sang SMC, katimbang ang multinasyunal nga mga institusyon kag bangko nga Japanese, Amerikano kag British.

Sa subong, anom na ka planta nga LNG ang may operasyon sa pungsod, kag lima sini ang yara sa baybay sang Batangas.

Tambakan sang sarplas nga LNG sang US

Ginbukas sang Pilipinas ang pag-import sang LNG halin 2021 sa atubang sang ginbalita nga nagahilapit nga pagkaubos sang reserba nga natural gas sa Malampaya gas fields sa 2027. Ginagamit ini sang US para iduso ang pungsod nga mag-import sang LNG.

Ang US ang nagapanguna nga prodyuser sang LNG sa bilog nga kalibutan halin pa 2011. Ginlapawan sini ang Russia, Australia kag Qatar kag nangin numero uno nga eksporter sa una nga higayon sadtong Disyembre 2023. Bunga ini nagapanguna sang pagpangagaw sang US sang baligyaanay sang LNG sa Western Europe (Germany, France, UK, kag iban pa) nga sang una nagapatubod sa mga ginansya halin sa Russia. Magluwas sa ginpatuman sang US ang sangsyon kontra sa pagbakal sang LNG sa Russia halin nagdilab ang gyera sa Ukraine, ginpalupok pa sini ang Nordstream pipeline agud indi makapagwa sang LNG. Wala-tuo ang ginkinahanglan tukuron nga mga LNG terminal agud iimbak ang LNG halin sa US nga ginadala sa Western Europe sakay sang dalagko nga barko.

Direkta nga resulta sang gyera nga proxy sang US sa Ukraine ang pagsumpit sang presyo sang LNG padulong sa $40 kada isa ka milyon nga British thermal unit (mmBtu) sadtong 2022. Amo pa man, tungod sa sobra nga produksyon sang US sang LNG, nabutong padalom ang presyo sa pangkalibutanon nga merkado padulong $9.80 kada mmBtu sadtong 2023.

Nagasala subong ang US nga magbukas sang bag-o nga mga merkado kag monopolisahon ang daan nga mga merkado sa Asia para mangin tambakan sang sarplas nga LNG kag ipabilin nga mataas ang demand kag presyo sini. Pinaka-interisado nga mag-import sang LNG ang mga kumpanya nga Amerikano pareho sang ExxonMobil, Novatek kag Chevron.

Nagnubo man ang presyo sang LNG sa pangkalibutanon nga merkado, temporaryo lamang ini kag wala nagakahulogan nga panubuon sini ang sukot sang kuryente sa Pilipinas. Sadtong 2023, mas mataas sang $1-$3/mmBtu ang imported nga LNG kumpara sa lokal nga natural gas. Sandig sa tantya sang Institute for Energy Economics and Financial Analysis, yara sa ₱9 kada kilowatt hour (kwh) tubtob ₱16/kwh ang presyo sang nagakahimo nga enerhiya halin sa imported nga LNG. Mas mataas ini sa abereyds nga ₱7.38/kwh nga presyo sang enerhiya halin sa kapareho nga imported nga karbon kag diesel sadtong 2023, kag ₱4.4/kwh gamit ang lokal nga solar power.

Sa pihak sang sigurado nga mas mataas nga sukot, ginhimo pa nga rekisito sang Department of Energy ang pagkuha sang tanan nga distribyutor sang kuryente halin sa mga planta nga nagaproseso sang imported nga LNG. Sandig sa “energy map” sang rehimen Marcos, pataason sang Pilipinas ang paggamit sang imported nga LNG kag mga enerhiya nga “renewable” halin 29% (kung sa diin 13% ang LNG) padulong 35% pag-abot sang 2030 kag 50% sa 2050.

Pamahog sa VIP kag palangabuhian sang mga mangingisda

Ginalibod ang LNG isip “transition fuel” tungod mas limpyo kuno ini kumpara sa karbon kag diesel. Amo pa man, nagatuga pa gihapon ini sang mga greenhouse gas (GHG) pareho sang methane, carbon monoxide kag carbon dioxide. Sa kamatuoran, naglutaw sa mga pagtuon nga mas nakapalain sa kinaiyahan ang ginatuga sini nga methane, tungod 80-100 beses ini nga mas madugay nga nagauyat sang init sa atmospera kumpara sa carbon dioxide.

Ginsuguran sa panahon sang pandemya (2021) kag natapos sadtong 2023 ang konstruksyon sang Ilijan LNG terminal. Gintukod ini sang AG&P, isa ka kumpanya nga nakabase sa United Arab Emirates, katimbang ang Osaka gas kag Japan Bank for International Cooperation. Sadtong Pebrero, ginbakal sang Amerikano nga kumpanya nga Nebula Energy ang dibisyon sang AG&P nga nakati-on sa LNG.

Kahimbon sang Ilijan LNG terminal ang Batangas Combine Cycle Power Plant nga ginapatindog subong sang AMGP sa Sta. Rita, Batangas. Apisar magkahamulag nga proyekto, magkasugpon ang duha ka pasilidad kag naga-atubang sa pareho nga bahin sang VIP.

Sandig sa pagtuon sang maki-kinaiyahan nga grupo, pamahog ang duha ka pasilidad, kag iban pa nga kapareho sini, sa ekosistema sang VIP nga ginakabig sang mga siyentista isip “pinakamanggaran nga habitat pandagat” sa bilog nga kalibutan. Sa konstruksyon pa lang, apektado na sang sediment kag balas ang sakop sang pasilidasd. Gindisturbo sang konstruksyon ang siklo kag pagpuyo sang mga isda kag iban pa nga kabuhi sa dagat indi lang sa hinanali nga sakop sini, kundi sa bug-os nga VIP. Nagresulta ini sa ilabi nga pagnubo sang kalidad sang mga coral reefs kag paghagmak sang panguha sang mga mangingisda.

Magluwas sa kahalitan sa kadagatan, naatubang man ang AG&P sa kaso sang iligal nga pagbaylo-gamit sang mga dutang agrikultural sa mga barangay sang Ilijan kag De La Paz. May mga kaso man ini nga iligal nga pag-utod sang mga puno sang lubi sa lugar. Sa kamatuoran, nagpagwa sang “cease and desist order” ang Department of Agriculture batuk sa kumpanya sadtong nagligad nga tuig tungod sa kawad-on sini sang permit sang pagbaylo-gamit sang duta. Tanan nga ini ang ginpawalaan sang AG&P kag mga bangko sang Japan.

Madugay na nga apektado ang ginatos ka mangingisda sa Batangas sang mga operasyon sang mga planta nga pang-enerhiya sang First Gen kag SMC. Bag-o pa ginsugdan nga tukuron ang mga bag-o nga planta kag pasilidad, masobra katunga na ang ginbuhin sa panguha nga isda (tulingan kag marot) halin 2019. Ilabi pa sila nga naipit sang ginbawalan ang pagpangisda sa mga baybayon lapit sa konstruksyon.

Dugang diri, ginakahangaw-an sang mga residente ang posible nga pagka-usik sang LNG sa kadagatan, ilabi pa nga bulnerable ang VIP sa baskog kag grabe nga bagyo. Wala pa nakabawi, kag posible indi na makabawi, ang VIP halin sa kahalitan nga gintuga sang pagkausik sang lana halin sa barko nga gin-arkilahan sang SMC, ang MT Princess Empress, sadtong nagligad nga tuig.

Ilabi nga magahigko ang hangin kag tubig sa Batangas kadungan sang pagtadtad sang baybayon diri sang mga planta sang mahigko nga enerhiya. Ilabi man madisturbo ang kabuhi sa dagat tungod magadamol ang paggwa-sulod sang mga barko nga magadul-ong sang imported nga LNG.

Ilabi nga mawad-an sa makuhaan sang palangabuhian kag mangin sang puluy-an ang madamo nga komunidad sa baybayon. Naga-isip sa duha ka milyon Pilipino ang direkta nga nakasandig sa manggad sang kadagatan sang VIP.