Pito ka residente sa Sityo Balubad sa Barangay Anunas, Angeles City sa Pampanga ang napilasan sadtong Marso 12 sa patarasak nga pagpaniro sang mga pulis. Nagserbe nga pwersang pangseguridad ang mga pulis sa demolition team sang Clark Hills Properties Corporation nga naglusob sa sityo para bungkagon ang barikada sang mga residente. May isip nga 500 ang gintingob nga pwersa sang mga pulis kag maton. Apektado sang plano nga demolisyon ang masobra 500 ka pamalay sa 72-ektarya nga duta nga gina-angkon sang kumpanya. Ginabulubanta nga 2,000 residente ang biktima sang pagpang-agaw sang duta.

Mapintas nga ginguba sang mga pwersa sang estado kag maton ang balay nga lapit sa barikada kag pilit nga ginsulod ang mga lulutsan sang baryo. Sa atubang sang pagpangapin sang mga residente, nagpalupok sang pusil ang mga pulis nga nagpilas sa pito ka residente sa ila nga dughan kag hita. Ginpahog man nila ang duha ka tigpamahayag nga nagabalita sang kapintas.

Pagkasunod adlaw, liwat nga ginsulod sang mga maton ang sityo kag ginpangbuka ang mga bintana sang mga balay.

Pagpamomba. Indi magnubo sa 22 ka bomba ang ginhulog sang AFP halin sa kahawaan sa mga komunidad sa Abra halin Pebrero 25 tubtob Pebrero 27. Ginsundan ini sang pagpanganyon kag pagpang-istraping sang mga suldado nga nag-igo lapit sa mga palangisdaan, lawigan kag talamnan sang mga residente. Apektado sini ang dulunan sang Barangay Bazar, Sallapadan kag Barangay Bulbulala, Licuan-Baa.

Sa Bukidnon, liwat nga ginkanyon sang mga tropa sang 10th ID ang Valencia City sadtong Marso 10, alas-10 sang aga tubtob alas-2 sang hapon. Indi magnubo sa 18 ka beses nga nagbuya sang bomba ang mga pwersa sang AFP gamit ang mga 105 howitzer nga nakapwesto sa Sityo Bulakaw, Barangay Concepcion sa nasambit nga syudad.

Pagpaniro. Patarasak nga naniro ang 2nd IB sa Sityo Cayang, Barangay Liong, Cataingan, Masbate sadtong Marso 11 kag ginpagwa nga isa ka “engkwentro” sa Bagong Hukbong Bayan (BHB) ang nahitabo. Ginpahog kag ginpilit pa sang militar ang mga upisyal sang barangay nga magpirma sang sertipikasyon nga nagapamatuod nga may nahitabo nga inaway sa lugar.

Iligal nga detensyon kag deportasyon. Arbitraryo nga ginbilanggo kag pilit nga ginpabalik sa The Netherlands ang Pilipino nga aktibista nga si Marikit Saturay sang nagbisita siya sa Pilipinas sadtong Marso 7 para magtambong sa kaadlawan sang iya nga lola. Tatlo ka gab-i siya nga ginhunong sang Bureau of Immigration (BI) sa Ninoy Aquino International Airport bag-o pilit nga ginpabalik sa ginhalinan nga pungsod. Hambal sang BI, yara sa “blacklist order” si Saturay tungod sa pagpakigbahin sini sa mga “kontra-gubyerno nga mga aktibidad.”

Pagpang-ipit. Wala-untat nga intimidasyon kag harasment ang ginahimu sang mga pwersa sang estado sa pamilya sang mga Pulang hangaway sang BHB nga namartir sa Bilar, Bohol sadtong Pebrero 23. Pasulit-sulit nga ginkadtuan sang pulis ang pamilya sang namartir nga si Perlito Historia sadtong nagligad nga semana para piliton sila nga iatras ang plano nga ipa-awtopsiya ang bangkay sang biktima. Ginsuholan sang pulis ang pamilya ni Historia kag ginpaandaman sang wala sini ginbaton ang kwarta.

Paglapas sa kinamatarung sang mga mamumugon. Liwat nga gin-ipit ang lider sang Technol Eight Philippines Workers Union (TEPWU)-OLALIA-KMU nga si Mario Fernandez sadtong Marso 9. Ginapatihan ang amo nga pagpang-ipit ang kaangot sang nagahilapit nga pagpakignegosasyon nila para sa panibag-o nga collective bargaining agreement (CBA). Amo man ini ang inagihan niya sadong 2022.

Samtang, ginbalewala sang kumpanya nga Profood International Corporation ang mamumugon sini nga si Isidro Rosell, 62, sang maaksidente sa Mandaue Plant sa Barangay Maguikay, Mandaue City, Cebu. Dise-otso ka tuig na nga nagatrabaho si Rosell sa kumpanya. Naaksidente siya sadto pang Pebrero 20 sang nahulog sa trak nga iya ginakargahan sang cocoshells nga ginahakot halin sa pabrika. Nagtuga ini sang blood clot sa iya nga utok. Nagapamalibad ang kumpanya nga maghatag sa iya sang bulig.