Ginadayaw sang Leonardo Panaligan Command-New People’s Army ang pursigido nga pagpatuman sang mga desisyon sang Rebolusyonaryong Korte sang Pumuluyo matapos ang pagvista kag pagpamatbat sanday Noleto ‘Noleng’ Hermoso sang Sityo Inatito, Brgy Bucalan, Canlaon City kag Danilo Sandot sang Sityo Palasan, Brgy Guba, Vallehermoso, Negros Oriental sadtong Pebrero 21-22, 2023.

Patay si Danilo Sandot sang ginpatuman sang NPA ang silot-kamatayon sa kaso nga pagpanglugos sa iya kaugalingon nga anak kag bayaw. Ginpatuman ini sadtong Pebrero 22, 2023 sang gab-i sa sityo Palasan, Brgy Guba,Vallehermoso, Negros Oriental. Otso anyos pa ang iya anak nga babaye sang ginkonsumo ni Danilo sadtong tuig 1987. Nahadlok ang biktima sa pagpanugid sa iya iloy kag mga utod bangud ginpahug siya nga patyon kon mabal-an sang bilog pamilya kag iban pa nga mga himata sini. Tuig 2016 pwersa nga ginlugos naman ang iya kaugalingon nga bayaw (asawa sang iya utod nga lalaki). Tuig 2019 pa nga gindesisyunan sang Korte sang Pumuluyo apang may pila ka datus nga ginkonsiderar kag ginreview karun nga tuig 2023. Unanimous nga nagtindog ang mga hukom sang nasambit nga rebolusyonaryong hukmanan nga ipatuman ang pagsilot sang kamatayon kay Danilo pabor sa mga biktima.

Pebrero 21,2023 alas 7:00 sang gab-i, madinalag-on man nga nakumpiska sang New People’s Army ang 4 ka .45 cal pistol kag 1 ka 12 gauge shotgun, mga magasin kag mga bala sa posesyon ni Noleto Hermoso sang sityo Inatito, Brgy Bucalan, Canlaon City. Si Noleng ang taghupot sang illegal nga mga armas. Nagapalupok kag nagapamahug sa iya mga katupad. Pila na ka bes ginpa-andaman sang NPA si Noleng apang wala nagabag-o rason nga ginpatuman sang NPA ang pagdis-arma upod ang mabaskog nga pagpaandam kay Hermoso.

Ginapanawagan sa tanan nga yunit sang NPA idalum sa Leonardo Panaligan Command nga maglunsar sang madinalag-on kag malapnagon nga taktikal nga opensiba batok sa pasistang AFP, PNP kag iban pa nga mga mapintas nga makinaryas sang estado.