Brutal nga ginpatay sang mga katapo sang 94th IB ang duha (2) ka katapo sang Mount Cansermon Command sang New People’s Army South Central Negros Guerrilla Front (MCC-NPA) nga ila gindakop sang Pebrero 4, 2023 pasado alas 4:00 sang hapon sa Sitio Mugni, Brgy. Oringao, sakop sang Kabankalan City.

Nagapahuway sa isa ka kamalig si Arjen “Ka Nonong” Mahinay bangud na-stroke kag indi na makahulag kag makahambal upod ang naga-atipan sa iya nga medical officer nga si Junjun “Ka Roben” Callet. Ginpagwa sang 94th IB nga napatay sa isa ka peke nga engkwentro ang duha sang Pebrero 5, 2023, alas 7:00 sang aga.

Makabig nga hors de combat ukon wala sang ikasarang nga magbato ang duha ka Pulang hangaway. Isa ini ka paglapas sang Internasyunal nga Makatawhanon nga Laye kag Comprehensive Agreement on Respect of Human Rights and International Humanitarian Law (CARHRIHL). Kabahin ini sang mahigko kag kalakaran sang AFP nga kon may madakop nga mga katapo sang NPA ginapaidalom sa torture kag ginapagwa nga napatay sa engkwentro.

Dugang dire, ginpakamalaut sang MCC-NPA ang ginhambal sang AFP nga katapo sang NPA si Jomarie Calumba nga ila man gindakop kag ginpatay sang Pebrero 4 sa amo gihapon nga oras kag lugar sang mga hors de combat. Ang matuod, isa siya ka mangunguma nga nagapanglawig lang sang iya karabaw sang gindakop kag ginpatay sang mga tropa militar.

Indi matuod nga may ara duha ka engkwentro baliskad sa ginawakal sang AFP. Ang matuod natabo ang isa ka engkwentro sa tunga sang yunit sang MCC-NPA kag mga elemento sang 94th IB sang Pebrero 4 pasado alas 5:00 sang hapon sa Sitio Mugni, Brgy Oringao. Pero hilway nga nakamaniobra ang yunit sang NPA matapos ang lapit 10 minutos nga baylohanay sang lupok. Ginkanyon pa gid sang militar ang lugar sang duha ka beses pasado alas 7:00 sang gab-i. Gindakop na sila si Ka Nonong, Ka Ruben kag ang mangunguma nga si Jomarie Calumba antes pa man ang engkwentro.

Indi man matuod ang tinikal sang 94th IB nga may narekober nga mga armas kag ginpakita pa ang mga picture sini nga athag nga halin mismo sa ila armory.

Liwat nga ginkanyon sang makapila ka beses ang bukid sang Buyuron kag Tampukon sang Pebrero 5 nga nagtuga sang grabe nga kahadlok sang pumuluyo sa lugar. Amu na ini ang ginkabig nila nga engkwentro kag ginpagwa nga napatay si Ka Roben kag Ka Nonong upod si Calumba.

Lubos nga ginkundenar sang MCC-NPA ang ini nga kahimuan sang AFP. Ang bilog rebolusyonaryong pwersa naga-upod sa panawagan sang hustisya sang himata sang mga napatay. Ginpangabay man sang MCC-NPA ang mga LGU, mga taga-simbahan kag iban pa nga human rights advocates nga mabuligan ang mga pamilya sang biktima para maimbestigahan ang ini nga grabe nga paglapas sang tawhanon nga kinamatarung.

Sa pihak sini tanan, pasabton sang MCC-NPA ang tropa sang 94th IB kag bilog AFP lakip na ang ila mga makinaryas sa ila mga kalapasan kag mahigko nga gyera nga ginalunsar batuk sa pumuluyo.###