Sa bukiran sa Sityo Katabadan Brgy. San Roque, San Miguel, Surigao Del Sur kaniadtong September 18, 2022 gidakop sa mga bangis nga tropang militar ilalom sa 75th IBPA ang pito (7) ka mga yanong sibilyan ug kabus nga mga mag-uuma. Ang mga biktima naila sa pangalang: Leboy Montenegro, 28 anyos, iyang asawa nga si Etshell Arcinal Montenegro, 22 anyos, si Erlyn Montenegro, 32 anyos, John Paul Montenegro, 18 anyos, Archie Montenegro 17 anyos, Dennis Montenegro 16 anyos ug si Raffy Arcinal didto sa ilang umahan.

Kasamtangang nagpondo ang tropang militar sa sityo Katabadan tungod sa ilang programang COPD/RCSP. Kabahin sa mga palisiya sa army nga mananghid ang mga residente kung sila mogawas o mosulod sa ilang komunidad labi na kung moadto sa ilang mga bukiran. Alayon niini, nag abiso ang pamilyang Montenegro sa mga sundalo nga moadto sa ilang umahan aron manghag-ot/ magyu-yu sa abaca ug sila gawasnong gitugutan sa mga sundalo.

Busa, alas 6:00 pa lamang sa buntag niining adlawa (September 18, 2022) nagdesisyon na ang pamilya nga mosubida sa ilang bukid. Didto sa ilang umahan atol sa ilang pagtrabaho, kalit nga mitunga ang mga bangis nga tropa sa 75th IBPA dayun gidakop ug gipanggapos sila ug walay kukaluoy nga gikulata labi na si John Paul Montenegro nga giputos og trapal ang iyang tibuok lawas dayon gitadyak-tadyakan sa militar ug si Leboy Montenegro gisulod sa selopin ang ulo dayon gipakamang-kamang atubangan sa uban pa nilang mga kauban.

Gipasumanginlan silang mga myembro kuno sa CPP-NPA luyo nga matinud-anon silang nag abiso sa mga sundalo adiser niadto sa ilang umahan. Gisinati sa pamilyang Montenegro ang grabeng pisikal ug mental torture gikan sa mga uhaw sa dugo nga tropang 75th IBPA. Halos 13 ka oras sila sa kamot sa mga berdugo. Gikan sa buntag, alas 9:00 sa gabie na sila gipauli sa ilang panimalay. Anaa pa sa trauma ang mga biktima labi si John Paul nga nagka angol-angol pa tungod sa iyang nasinati.

Kining mangtas nga binuhatan sa 75th IBPA ug sa uban pang tropang militar ngadto sa pamilya ug sa uban pang mga biktima tinuod nga naghulagway sa ilang pagkabangis ug pagka mersenaryo. Imbis nga mutabang matud pa, ang COPD/RCSP, hinuon naghulga kini sa seguridad ug panginabuhi sa mga kabus nga mag-uuma.

Sa kasamtangang rehimeng US Marcos-Duterte, lauman nga daghan pang mga susama niining mga kaso sa pagpanglapas sa tawhanong katungod ang himoon sa pasistang tropa sa militar ngadto sa mga uyamot nga mga sibilyang mag-uuma.

Busa, alang sa katawhan gikinahanglan ang hugot nga panaghiusa ug hiniusang suklan ang kabangis sa reaksyonaryong militar. Dili mahadlok ug padayong ibutyag ang pangpangdaugdaog ug pagpanglapas sa tawhanong katungod!
Suklan ang Martial Law sa katawhan!