Gisilotan sa Bagong Hukbong Bayan – Agusan del Sur (BHB-ADS), Northeastern Mindanao Region ang usa ka agalong yutaan nga nailang si Roleto ‘Olet’ Peñaloga nga taga- Brgy. Libertad, Bunawan, Agusan del Sur pinaagi sa pagsunog sa iyang gipanag-iyahang makinarya kagahapong adlawa, Marso 8, sa may kapin kun kulang alas onse sa kabuntagon didto sa Brgy. Manat, Trento, Agusan del Sur.

Ugdaw sa maong pagsilot ang usa ka elf truck ug parmol truck nga kargahan sa hinarvest nga mga bunga sa oil palm.

Ang rebolusyonaryong hukmanan sa katawhan nakatibuok sa desisyon nga himuon ang aksyong pagsilot base sa gibug-aton sa iyang kasong nahimo batok sa katawhan ug rebolusyonaryong kalihukan. Ang iyang mga kaso mao ang mosunod:

(1) pagpangilog og yuta sa mga mag-uuma;

(2) pagpasiugda sa illegal logging ug pagbutang og mga bansuhan sa lasangong bahin sa Brgy. Imelda ug Bunawan Brook, sakop sa lungsod sa Bunawan, Agusan del Sur;

(3) kakunsabo ang kumpanya sa Agusan Plantation Oil Incorporated (API), gipig-otan ug gihikawan sa ilang mga batakang katungod ang mga mag-uuma ug nagapangolekta og porsyento ngadto sa mga mag-uuma sa ngalan sa NCIP;

(4) pagtukod og mga asset nga aktibong moreport sa AFP/PNP ug nagapaniktik (nagapaniid) sa lihok sa Bagong Hukbong Bayan sa lugar.

Kining aksyong pagsilot sa Bagong Hukbong Bayan nagsilbing pahimangno o warning sa tanang langyaw nga kompanya, lokal nga agalong yutaan ug mga opisyal sa gobyerno nga nagahimo og kadaut ngadto sa katawhan sulod sa probinsya sa Agusan del Sur ug tibuok nasud. Angayang hinumduman, ang Bagong Hukbong Bayan kanunay nagadepensa ug naga-alagad sa interes sa katawhang kabus, nilupugan ug pinahimuslan. Kung aduna man silay pagahimuon nga sama sa nasangpit nga mga kaso, manubag sila sa rebolusyonaryong kalihukan.

Mabuhi ang masang nakigbisog!

Padayong depensahan ang kaayuhan sa katawhan ug kinaiyahan!

Sampa sa Bagong Hukbong Bayan!