Read in: English

Ang Bagong Hukbong Bayan-Surigao del Sur sa Northeastern Mindanao Region (BHB–SDS-NEMR) hugot nga nagkondena sa brutal ug walay kukaluoy nga pagpatay kang Rolando “Tatay Bodoy” Patinio Leyson Sr., 78 anyos. Gipatay siya sa mga ahente sa estado didto mismo sa iyang balay sa Km. 20, San Pedro, Sison, Surigao del Norte sa may alas 11:30 sa gabie. Pwersahang gipukaw siya tapad ang iyang apo ayha gipusil hangtud nga namatay.

Naila si Tatay Bodoy nga amahan ni Ka Edroy usa sa mga lider sa BHB sa Surigao del Norte. Kini ang rason nganong gipatay siya sa mga walay konsensya, mersenaryo ug berdugong AFP ug PNP.

Isa lang siya sa daghang mga nahimong biktima sa pagpamatay ilalom sa rehimeng US-Duterte. Daghan pang mga pamilya ang nakasinati sa pagpanghasi ug pagpanghulga ilabina ang mga pamilya nga adunay gidudahang anak o ginikanan nga BHB. Ginatawagan, ginatext ug ginapresyur sa AFP ug PNP ang ilang pamilya aron pasurenderon sila ug ang ilang anak. Adunay mga kahimtang nga ginasunod-sunuran sa eskwelahan ug lugar nga gitrabahuan sa mga ahente sa estado ang mga anak ug kapamilya sa BHB. Kanunay’ng ginamonitor ug ginasurbeylans ang ilang mga lihok ug ginasundan sa mga naka-riding in tandem.

Kining tanan, mga desperadong lakang sa rehimeng US-Duterte aron puohon ang rebolusyonaryong kalihukan sa NEMR. Ang mga walay ikasukol nga sibilyan mao ang ginatarget sa mga naghuramentadong pagpamatay ug pagpanghulga aron lamang makamugna sa kahadlok nga makapaluya sa pagsalmot ug paglahutay sa rebolusyon sa mga membro sa BHB.

Apan taliwala niining teroristang lakang sa rehimeng US-Duterte, nagpabiling taas ang determinasyon, kalig-on ug kaligdong sa rebolusyonaryong kalihukan. Dili bisan kanus-a dali nga mahadlok ug mahaylo ni Duterte ang rebolusyunaryong pwersa ug ang katawhan pinaagi sa iyang kabangis, gani mas magsugnod pa kini og grabeng kasilag ngadto kaniya. Magpadayon ang rebolusyonaryong kalihukan inubanan sa kusog sa katawhan dinha sa pagpangita og hustisya alang sa tanang biktima sa pagpanglapas sa tawhanong katungod.

Hustisya alang kang Tatay Bodoy!
Hustisya alang sa tanang biktima sa ekstrahudisyal nga pagpamatay!
Papanubagon si Duterte ug ang iyang naghuramentadong AFP ug PNP sa ilang mga krimen batok sa katawhan!