Ang kabilugan nga pwersa sang Mount Cansermon Command-New People’s Army (MCC-NPA) upod sa mga rebolusyonaryo nga organisasyon masa kag pumuluyo sa South Central Negros lubos nga nagakundena sa utok-pulbura nga pahayag ni NSC adviser Gen. Eduardo Año angot sa pagpugong sa liwat nga paglunsar sang peace talks sa tunga sang National Democratic Front of the Philippines ukon NDFP kag reaksyunaryong gobyerno sang Pilipinas.

Athag sa iya ginpanghambal nga indi pabor para sa iya kag sa rehimen US-Marcos II ang pakig-isturyahanay para sa makatarunganon nga kalinong. Bilang mga nagapanguna nga tagataghol sang imperyalistang US, si Año, Marcos Jr kag mga kahimbon nga mga opisyal sa militar indi luyag nga mag-atubangay sa lamesa liwat ang GRP kg NDFP, bisan pa man sa deklarasyon sang subong nga rehimen sang nagligad nga Nobyembre 2023 nga may yara pagpaninguha nga mabuksan ang peace talks.

Gani, tuman ka ilohikal kag baliskad ang pahayag ni Año nga dapat magdeklara anay ang rebolusyonaryong pwersa nga indi na maglunsar sang armadong paghimakas para magpasugot ang GRP sa isturyahanay. Ini gapakilala lang nga wala nakahangup ang mga mersenaryo kag berdugo kon ano ang ginahimakasan sang pumuluyong pigos kag ginahimuslan sang nagligad nga 55 ka tuig. Dapat pamensaron ni Año nga imposible ang basta-basta nga pagsungka sang mga Pulang Hangaway bangud bastante pa ang rason kon nga-a mag-uyat sang armas kag magbato.

Tani mahangpan ni Año kag ni Marcos Jr nga ginalunsar ang peace talks para makapangita sang diplomatiko kag prinsipyado nga pagresolbar sang armadong konplikto sang GRP kag NDFP. Dapat nakabase man ini sa makatarungan nga kalinong kag pagrespeto sa kinamatarong sang pumuluyo. Indi ini dapat himuon nga basehan nga untaton ang dungganon nga armadong rebolusyon ukon ano pa nga mga maniobra kag padihot sang reaksyunaryong gobyerno para intoon ang pumuluyo. Klaro lang nga si Año kag iya mga kahimbon mango sa proseso kag gapangdasmag nga daw ido buang para sa interes sang nagaharing sahi kag US.

Indi kalinong kundi gyera ang gusto sang Marcos Jr. nga rehimen. Luyag sang reaksyunaryong gobyerno nga gyerahon ang pumuluyo paagi sa gutom kag bala.

Gyera sa gutom, nga maathag sa pagpasulod sang mga dumuluong nga negosyo sa Negros pareho sang mga mina, kwari, kag komersyal nga pagpatanom sang kahoy ukon tanom pang-export, samtang ang mayoriya sang Negrosanon naga-agwanta sang bilog-tuig nga tigkiriwi, kakulangan sang sweldo, palangabuhian, kag duta.

Gyera sa bala, nga gani sini lang nagligad nga Agosto 22 ginpatay ang mag-asawa nga Joan Encancion kag Jolina Martinez sa Sitio Pisok, Barangay Buenavista, Himamaylan City bilang dugang sa indi na maisip nga krimen sang 94th IB kag AFP, PNP, NTF-Elcac sa lugar, bilang mga mersenaryong manugdepensa sa mga negosyo kag interes sang dumuluong kag lokal nga mga agalon mayduta kag dalagkong kumprador nga kasosyo sang imperyalismo.

Sa sini nga mga basehan, indi sayup kag basta lang magsungka ang armadong rebolusyon. Samtang nagapadayon ang pagpamigos kag pagpanghimulos, adlaw-adlaw may rason ang pumuluyo nga magbato sa isa ka garok nga malakolonyal kag malapyudal nga sistema. Samtang may ginapatay sa gutom ukon bala, wala na sang lain pa nga banas nga kadtuan ang masa kundi ang matutom nga pagpabaskog sang iya hanay para isulong ang demokratikong rebolusyon sang banwa, kag mag-intra sa NPA. Gani, magapadayon ang MCC-NPA sa paglunsar sang mga taktikal nga opensiba para sa hustisya kag demanda sang pumuluyo. Ang inaway banwa para sa kalinong sang banwa.