Ang impeachment isa ka pulitikal nga proseso para pasabton sa publiko ang sin-o man nga mataas nga opisyal sang pungsod sang ila akawntabilidad. Sa pihak sang mabaskog nga demanda sang masa nga pasabton si VP Sara Duterte sa madamo nga kaso sini, kaangay lang nga ginaproteheran sang Korte Suprema ang mga Duterte ilabi na si Sara Duterte pagkatapos nga nagpaguwa ini sang indi nagakaangay, maka-ilinsulto kag indi popular nga desisyon. Ang tikang sang Korte Suprema nga punggan ang Kongreso kag Senado sa pagtigayon sang mandato nga pagbista sang isa ka impeachment court isa ka “out right” nga pag-abuso sang iya gahum nga wala sang pagkonsidera sa pagkamakatarungan sang sini nga proseso pulitikal kag sa popular nga sentimyento sang kadam-an sang pumuluyo halin sa nagkalain-lain nga sektor kag grupo sa pungsod.

Nagalanog ang kagustuhan sang pumuluyo nga mag-atubang si Sara Duterte sa impeachment court kag mapanabat siya sa iya mga ginapangatubang nga kaso. Madumduman nga may pito ka artikulo ang impeachment kag amo ang masunod:

1. Pagpamahog nga patyon si Presidente Bongbong Marcos, iya asawa nga si Liza Araneta-Marcos kag si House Speaker Martin Romualdez (ginhimo ini sadtong Nobyembre 23, 2024 sa tunga sang pagtalakay sang confidential funds sang iya opisina);

2.Korapsyon sa Php615.5 milyon sa confidential funds;

3. Pagpanuhol kag korapsyon sa Department of Education;

4. Indi ma-eksplikar nga manggad kag kapaslawan nga ibuyagyag ang iya mga propyedad sa Statement of Assets, Liabilities and Net Worth (SALN);

5. Pagkadalahig sa eksta-hudisyal nga pagpamatay sa Davao City;

6. Mga maniobra nga destabilisasyon kabahin ang pagboykot niya sa State of the Nation Address kag pagharang sa mga pagtalakay sa Kongreso; kag

7. “Pangkabilugan nga kondukta” bilang bise presidente kag ikaduha nga pinakamataas nga opisyal sang pungsod.

Ara na sa Kongreso ang bug-at kon paano mapanabat si VP Sara paagi sa pagpresentar sang mga ebidensya kag nagakaigo nga argumento. Sunod sini, ara naman sa Senado ang pinal nga desisyon kon bala pamatbatan nga guilty ukon i-akwit ini. Ang importante, madayon ini nga proseso para mahibaluan sang pumuluyo ang kamatuoran sa likod sang ila malawig nga paghinulat.

Pila na ka bulan ang nagligad, daw bola nga ginapasa-pasa lang ini. Magluwas sini may pila ka senador nga maki-Duterte nga nagtuyo sa umpisa pa lang nga punggan ang impeachment paagi sa pagpabasura sini.

Ang mabaskog kag malapad nga demanda kag paghulag sang pumuluyong Pilipino ang makabulig agud maimpluwensyahan, mapamuklat kag mapwersa ang Senado kag Kongreso nga magpanindugan sa kamatuoran kag hustisya kag tumanon ang katungdanan nga ginhatag sa ila.

Ang pagpamilit nga ibasura ang impeachment labi nga magatuga sang kinagumon sa pulitikal nga proseso kag pagkadula sang salig sang pumuluyo sa sistema sang hustisya sa pungsod. Lubos nga ginahamulag sini ang rehimeng Marcos II, ang Korte Suprema kag ang Senado bangud sa ila mga kontra-pumuluyo, kontra-demokrasya kag kontra-hustisya nga tikang. Ginapamatud-an lamang nila kon kanday sin-o gid nga interes ang ila ginapangapinan kag ang tuyo nga mintinaron sini ang status quo.

Bangud sini, paga-atubangon nila ang nagabalingaso nga balatyagon sang kaakig kag pagpanukot sang masa. Ginapamatud-an lamang sini nga wala sang kamatuoran kag hustisya nga lauman sa idalom sang rehimeng US-Marcos II. Labaw sa tanan, ginatulod sini ang masa sa matuod-tuod nga banas sang pag-angkon sang hustisya kag matuod nga pagbag-o sang katilingban nga Pilipino nga amo ang pagsulong sang demokratikong rebolusyon sang banwa. Solo gid lang sa paglunsar sang armado nga paghimakas paagi sa malawigan nga inaway banwa upod sa malapad nga masa ang sabat sa pag-angkon sang isa ka matarong kag may hustisya nga katilingban.

Pasabton si VP Sara Duterte sa iya mga kaso!

Manindugan para sa kamatuoran kag hustisya!

Isulong ang demokratikong rebolusyon sang banwa!