Nagalaba ang listahan sang mga paglapas sang mga militar sa idalum sang 3rd Infantry Division sa mga protocol of war sa ila padayon nga paglunsar sang focused military operations (FMO) sa mga binukid nga erya sang Panay.

Nadakpan nga buhi si Alvin Panoy alyas Ka Benmar sa natabo nga engkwentro sa Sityo Hilwan, Barangay Manika, Libacao, Aklan sang nagligad nga Oktubre 31, 2024. Suno sa panaysayon sang mga upod ni Ka Benmar sa natabo nga engkwentro nabatian pa nila ang urahab ni Ka Benmar dayon nabatian man nila ang mando sang opisyal sang militar nga higtan kag gintawag pa sila sang militar kag ginhambalan nga kuhaon ila upod. Nabatian pa ang singgitan ni Ka Benmar antes ginpabarakan sang bala kag nagsinggit ang militar nga “kuhaa patay nyo di” dayon singgit sang “advance Happy New Year.” Ini paglapas sa kinamatarung sang hors de combat ukon wala na sang kapasidad nga mag-away santo sa ginsaad sang Protocol of War kag Geneva Convention. Wala man sang kamatuoran ang ginpagwa sang militar nga may kasunod nga engkwentro nga natabo sang Nobyembre 1.

Wala naman pagrespeto sa patay ang ginhimo sang militar kay Jeryl Katipunan alyas Ka Jason. Napilasan si Ka Jason sa natabo nga engkwentro sa Barangay Tacayan, Tapaz, Capiz sadtong Disyembre 9, 2024 kag napatay samtang nagamaniobra atras ang yunit sang NPA. Bangud sa kabudlayan sang pagmaniobra napilitan ang iya kaupdanan nga ibilin ang iya bangkay kag tuyo man nga ipabalo sa pamilya agud makuha. Disyembre 10 sang aga sang nasapwan sang militar ang bangkay ni Ka Jason kag ginpaulanan sang bala kag ginpagwa nga may ikaduha nga engkwentro. Sa aktwal nga engkwentro sang Disyembre 9 isa lang ang naagum nga igo sang bala ni Ka Jason nga nag-igo sa iya hita kag nagderetso sa busong nga nakasamad sa iya internal organs rason sang iya gilayon nga kamatayon gani ang natabo sang Disyembre 10 kaangay lang sang mutilation ukon dugang nga pagsamad sa lawas sang bangkay.

Ini nga mga hitabo wala sang kinalain sa natabo sa mga kaupod nga nagkalamartir sadtong nagligad nga Agosto. Nadakpan sila nga wala na sang kapasidad nga magbato kag gintortyur antes ginpatay. Pamatuod lang ini sang pagkaberdugo kag kauhaw sa dugo sang mga militar. Ini nagapakita sang kalalaon sang krisis nga ginalukdo sang pumuluyo bangud indi masabat sang rehimeng US-Marcos II sa matawhay nga pamaagi ang problema sang pumuluyo gani nagakaduso sila nga lubadon ini paagi sa armadong pagbato. Samtang nagapadayon ang militarisasyon sa kaumhan padayon man nga magalaba ang paglapas sang militar sa kinamatarung sang pumuluyo.

Pumuluyo indi mahadlok, Batuan ang uhaw sa dugo nga militar!
Sukton sang hustisya ang AFP sa ila mga paglapas sa kinamatarung!
Sakdagon ang armadong paghimakas sang NPA!
Mabuhay ang mga martir kag baganihan sang rebolusyon!