Usa ka laing showcase na usab sa PNP/AFP ang pagdakop-pagpasangil sa 2 ka motorista nga nagkarga kuno og supply sa NPA.

Marso 31, 2021 alas-8 sa buntag gihold sa 29th IBPA-CAFGU detatsment sa may kadahundahunan ang 4 ka motoristang nagbyahe gikan sa Santiago. Gipangsusi/gidiskarga ang mga butang niini, ang 2 nga nagbyahe padulong sa Kibongbong maoy gipabalik lugsong sa Santiago, apan sa Sitio Mansablay pa gihold na sila sa bag-o lang nagmontar og checkpoint sa combined PNP ug SAF sa Santiago bandang 12:30 sa kaudtohon.

Dayon kining gidakop ug gipusasan, gipatalikod ug gipalayo sa ilang mga motor. Gibaharan pa nga pusilon kung moatubang.

Sa dihang gipa-atubang na sila, nakita nilang nakapatong na sa tangke sa motor ang cellophane blue nga naay sulod nga Improvised Explosive Device, 15 meters wire, 2 ka magazine sa M16 ug 30 ka buok nga buhing bala sa M16.

Kasamtangang naka-detain silang motorista Reymond Tanghal usa ka minyo may 2 ka anak ug si Daniel usa ka ulitawo parehong residente sa Brgy. Telespora, Tubay sa Municipal Police Station sa Santiago, Agusan del Norte.

Klarong giangkon ni Jayho Palobon taga-Purok 3, Pob.1, Santiago ang iyang 2 ka motor nga naka-impound sa MPS-Santiago ug ang mga kargamiento niini.

Buot lamang ipasabot niini nga laing binuhatan na usab sa kabangis kini ngadto sa mga yanong sibilyan! Pagpamakak ug pagpasumangil sa saysay ni Provincial Director Police Colonel Martin Gamba nga usa daw kadto ka supply sa NPA atol sa 52nd nga anibersaryo.

Laing tinumotumong mga akusasyon kini ug pagpamig-ot sa katungod ug kagawasan sa panginabuhian ug kalihukan sa katawhan.

Kakambyo niini ang mga reward sa promotion ilabina sa PNP-Regional Director Romeo Carramat Jr.

Ang maong susamang mga kaso nga hinimoan sa mga PNP/AFP ug sa mga piskal ug huwes: Among gipaabot pag-usab sa ngalan sa New People’s Army Agusan del Norte ug sa tibuok North Eastern Mindanao Region ang hugot namong pahimangno kaninyo! Manubag kamo sa rebolusyonaryong hustisya sa katawhan! Hinumdumi dili sa tanang panahon kamo maka-unipormi ug dili sa tanang higayon hawid ninyo ang inyong kasegurohan!

Ang pagkunsabohay sa PNP/AFP ug Piscal/huwes sa paglapas sa katungod sa katawhan parehong timaan sa kadunot sa panggamhanang sa rehiyon sa Caraga ug sa tibuok nasud. Samot nagpahimulag kini sa tinuod nga demokratikong pamaagi sa pagsulbad sa batakang suliran ug demanda sa masa sa katawhan!

Samot kini nga kahimtang naglatag sa pagpangita sa katawhan sa lahing bag-ong gobyerno nga magdala sa tinuod nga interes sa kinabag-an ug hustong modumala sa kahapsay sa katilingban.

Busa gihagit ang masa sa katawhan: ipahugot pa ang panaghiusa, lihok alang sa kausaban! Lihok ug papanubagon ang mga hingtungdan, ahensya ug institusyong dugay nang naglapas sa katungod sa katawhan!

Sa pikas bahin gihagit usab ang mga indibidwal nga membro sa PNP/AFP ug mga anaa sa buhatan sa gobyernong naghari nga matinud-anong moserbisyo sa kinabag-an! Ipakigbisog ang unsay angayan alang sa tinuod ug kinasingkasing nga pag-alagad sa katawhan isip sukli sa walay paltang pagbayad sa buhis sa katawhan nga gidawat usab ninyo isip sweldo. “Hinumduman nato nga ang masa ug ang masa lamang ang bugtong nagmugna sa sobrang bili pinaagi sa ilang dugo ug singot sa paghago nga maoy tinubdan sa nahimong ginansya sa pipilang naghari sa kapital sa katilingban ug nahimong tipik nga gigamit sa serbisyo sa katilingban”.

Busa makatarunganon lamang nga manukot ang masa sa katawhan sa kahago nga ilang giula sa katilingban.

Makatarunganong lamang ang pagpakigbisog sa katawhan sa ilang mga katungod sa pagpakabuhi nga desente ug malahutayon, demokratiko ug abunda.

Batukan ug ibutyag ang hiwi niining pangatarungan nga kung nakigbisog ang katawhan alang sa pagkab-ot sa mga katungod, hadlukon, dakpon ug patyon tungod kay mga terorista!

Ang nakigbisog nga katawhan batok sa pagpahimulos ug pagpalupig mga KOMUNISTA ug DILI MGA TERORISTA! Ang KOMUNISTA nakigbisog alang sa komon nga interes ug kaayohan sa kinabag-an! Dili sila ang angayang tawagong TERORISTA nga dakpon ug silotan!

Ang gobyernong nahadlok sa KOMUNISTA/KOMUNISMO mao ang BERDUGO ug TINUOD nga TERORISTA! Gihimo nila ang sama ka kaylap nga panghitàbo karon! Angayan silang ibagsak! Pulihan!

Mabuhi ang REBOLUSYON nga maoy mananabang sa pagpaanak sa bag-ong KATILINGBAN: ang SOSYALISMO ngadto sa KOMUNISMO!

Sampa sa New People’s Army!