Patuloy na hinahatak ng imperyalismong US ang Pilipinas sa karimlan dahil bukod sa pagpapanatili ng bulok na sistemang malakolonyal at malapyudal, nagpapatuloy ang panunulsol ng una sa huli ng gera sa China gamit ang hidwaan sa West Philippine Sea (WPS).

Hindi mapawi ang takot at pangamba ng buong bayan dahil sa banta ng gerang hatid ng imperyalismo. Pinakahuling pakana ng US para sa pagsasakatuparan ng mga plano nitong gera laban sa China ang pagbubuo ng Task Force Philippines sa pagitan nito at ng Pilipinas na inianunsyo lamang noong Oktubre. Lalong pinahihigpit nito ang kontrol sa Pilipinas upang pagsilbihin sa nilulutong gera sa Asia Pacific. Mag-oopereyt ang naturang task force sa buong bansa gamit ang 60 personnel na pinamumunuan ng isang one-star general o flag officer. Ayon sa kanila, real-time o mapapabilis nito ang palitan ng impormasyon at paniktik laban sa China dahil sa direktang paghawak ng US sa operasyon.

Kasuklam-suklam ang kamakailang hakbang ng kongreso ng US sa panukala nitong ibenta sa Taiwan ang mga base militar ng US sa tabing ng “pagpopondo para sa pagpapaunlad ng inprastraktura” ng mga pasilidad ng US sa mga tinatawag na EDCA sites sa bansa.

Ang direktang pakikialam ng US sa Pilipinas para idirehe ang gerang agresyon sa Asia Pacific ay nakaayon sa plano nitong panatilihin ang hegemonya sa rehiyon at sa buong daigdig laban sa imperyalistang China. Noong 2011, ipinatupad nito ang Pivot to Asia na naglipat ng 60% ng lakas-militar nito sa rehiyon para harapin ang China na itinuturing ng US na karibal sa imperyalistang dominasyon sa rehiyon.

Sa halip na piliing magresolba sa mapayapang paraan, lalong pinalalala ng kasalukuyang gubyernong Marcos II ang girian sa China sa WPS sa utos ng among US. Maamong tuta itong pumayag na maging bahagi ng first island chain ng US na lunsaran ng gera laban sa China. Nagsisilbing mouthpiece si Marcos Jr ng US sa pagpanukala ng mga programa ng US sa Southeast Asia at sa bansa.

Isinasaksak ng rehimen sa isip ng mga Pilipino na tama ang anumang maitim na balak ng imperyalismong US sa tabing na “paglaban sa pamumwersa at pagiging agresibo ng China sa South China Sea at WPS”. Pinasasakay pa rin ang taumbayan sa kasinungalingang matapat na “kaibigan” at “maaasahan” ng mga Pilipino ang US na magtatanggol diumano laban sa China.

Lahat nang ito ay bahagi ng gera sa impormasyon ng US para tusong ipatanggap sa mamamayan ang lantarang panghihimasok ng imperyalismong US at ang gerang inilalako sa Pilipinas. Malaon nang ipinatutupad ng US ang gera sa impormasyon sa Pilipinas. Sapul nang sinakop ang bayan, kinontrol ng US ang mga daluyan ng impormasyon gaya ng edukasyon, masmidya at ngayon, ang internet. Sa pag-ugat ng mga tropang Amerikano sa Pilipinas sa pamamagitan ng AFP, inilulunsad nito ang mga lihim na operasyong paniktik at gera sa impormasyon. Ipinatutupad ng gera sa impormasyon ang disimpormasyon sa anyo ng pagpapakalat ng fake news, historical revisionism at paninira sa lehitimong paglaban ng mamamayan para sa tunay na kalayaan at demokrasya.

Hindi lamang AFP ang pinopondohan para sa kampanyang disimpormasyon, kundi mga institusyon, organisasyon, midya at mga indibidwal na nagpapahayag ng katapatan sa US kabilang ang Akbayan, si Risa Hontiveros at iba pang ahente sa pakikidigmang sikolohikal nito. Habang nasa kongreso, namumutawi sa kanilang bibig ang propagandang US kaugnay sa sigalot sa WPS. Pinaiigting nila ang usapin para pahintulutan ang pagdaragdag ng base, tropa at kagamitang militar ng US sa bansa. Tuwang-tuwa sila sa mga bagong di-pantay na kasunduan ng Pilipinas sa US at mga dayong bansang Japan, Australia at iba pa mula sa Europe sa ngalan ng pagdedepensa ng Pilipinas at kapinsalaan ng bayan. Kasuka-suka ang litaw na pagkampi ng mga ito sa mga Marcos para umamot ng suporta mula sa US sa desperadong interes nitong mailuklok sa tuktok ng kapangyarihan sa Pilipinas.

Pinangunahan at pinopondohan ng Pentagon o Department of Defense ng US ang kasalukuyang gerang impormasyon sa Pilipinas na magsisilbi para itulak ang gera laban sa China. Mula gubyernong Biden hanggang gubyernong Trump, nagbuhos ito ng malaking pondo para sa pagpakat ng mga sundalo at iba pang tauhan sa paglikha at pagpapatakbo ng daan-daang mga pekeng account sa social media para magpalaganap ng Xenophobia laban sa China. Isinasagawa ng US ang kampanyang disimpormasyon alinsunod sa linya nito ng “aktibong kombat” na doktrinang pinaiiral ng US sa kompetisyon at pakikipaggirian sa mga imperyalistang karibal na China at Russia. Ginagamit ito ng US laban sa naturang mga imperyalistang karibal kahit walang nagaganap na tuwirang armadong sigalot. Nais itulak ng US ang gera laban sa karibal na China para pigilan ang anumang ekonomyang pag-unlad ng huli at makapagbenta ng armas sa mga kontroladong bansa gaya ng Pilipinas.

Target din ng kampanyang paninira nito ang mga kritiko, makabayan, progresibo at rebolusyonaryong pwersa na nananawagan ng diplomasya upang lutasin ang tunggalian sa WPS. Tinatawag silang “pro-China” at pinipigilan ang kanilang boses. Kasabay nito ay ang malisyosong pag-ugnay sa kanila sa CPP-NPA-NDFP ang disimpormasyong ikinakalat hinggil sa rebolusyonaryong kilusan.

Tanging imperyalismong US ang nakikinabang sa mga kasinungalingang ito para maisakatuparan ang makasariling interes na maghari sa buong daigdig. Habang nakikinabang sa proxy wars, ang mga mamamayan ng mga kolonya at malakolonyang bansa kagaya ng Pilipinas ang siyang nagdurusa. Hindi dapat hayaan ng mamamayang Pilipino na magpakasangkapan sa gerang inihahasik ng US!

Bilang mga alagad ng sining, dapat punitin ang kasinungalingan at ihatid ang liwanag sa mamamayan sa pamamagitan ng pagpapalaganap ng katotohanan. Kasama sa anti-imperyalistang paglaban ng sambayanan ang aktibong paglalantad, pagtutuligsa at pagpapasubali sa kasinungalingang ikinakalat ng US sa bansa.

Hamon naming iparating sa masa ang katotohanan at mensahe ng rebolusyon sa gitna ng laganap na kampanyang disimpormasyon ng estado na ipinatutupad sa balangkas ng gera sa impormasyon ng imperyalismong US.

Gamitin ang sining at literatura bilang sandata at pagsilbihin sa pagtataguyod ng kalayaan, demokrasya, katotohanan, makatarungang kapayapaan at sosyalismo. Labanan ang kultura ng pangangayupapa sa pamamagitan ng pagpapalaganap ng pambansa, siyentipiko at makamasang kultura. Lubusang makakalaya lamang ang bayan mula sa pagkakasaklot ng US sa larangan ng ekonomiya, pulitika, militar, kultura at relasyong panlabas sa pananagumpay ng pambansa demokratikong rebolusyon.