Gikundena sa Partido Komunista ng Pilipinas (PKP) ang rehimeng Marcos ug ang Armed Forces of the Philippines (AFP) sa pagdakop kang NDFP peace consultant Porferio Tuna niadtong Oktubre 2 sa Tagum City, Davao del Norte. Giduso sa Partido nga angay tahuron ang tanan niyang katungod, lakip na ang iyang katungod sa abogado nga iyang gipili, ug pagpagawason siya dayon.

Si Tuna nagsilbi isip peace consultant sa NDFP atol sa negosasyon uban ang gubyerno sa Pilipinas sa Norway niadtong 2016. Naghatag siya sa Negotiating Panel sa NDFP og bililhonng impormasyon bahin sa kahimtang sa mga mag-uuma, mga trabahante sa plantasyon, ug mga lumad sa Southern Mindanao, aron epektibong marepresentahan ug mapaasdang sa NDFP ang ilang mga interes sa pakignegosasyon ug paghimo og kasabutan alang sa kumprehensibo nga repormang sosyo-ekonomiko.

Ang pagdakop ug pagdetine kang Tuna klarong nagtinguha nga silutan siya sa pagbarog isip peace consultant sa NDFP. Ang pagdakop kaniya usa ka dayag nga paglapas sa Joint Agreement on Safety and Immunity Guarantees (JASIG), usa ka kasabutan tali sa gubyerno sa Pilipinas ug NDFP nga nagbabag sa usag usa nga maghimo og mga aksyong pagsilot batok sa mga peace negotiators ug personnel. Ang pagdakop kaniya dili makatabang sa paghatag og kumpyansa sa paningkamot nga ipadayon ang panaghisgot kalinaw.

Samtang anaa sa prisohan, gialirungan siya sa mga upisyal militar ingonman sa mga traydor nga nahimong mga ahente sa militar, aron pugson siyang talikdan ang iyang mga prinsipyo ug ang nasudnon demokratikong kawsa sa katawhan. Gipailalum siya sa grabeng sikolohikal nga torture. Gibaharan siya ug sa iyang mga mahal sa kinabuhi kung dili siya mosurrender ngadto sa mga pasista.

Mini ang mga kaso batok kang Tuna. Sama sa kasinatian sa kapin 800 ka detenido nga pulitikal, hinimo-himo lamang kini aron ibalhog siya sa prisohan sa dugay nga panahon.

Nanawagan kami sa tanang lokal ug internasyunal nga organisasyon sa tawhanong katungod, mga tigpanalipud sa kalinaw, ug demokratikong grupo nga motabang aron siguruhon ang hinanaling pagpagawas kang Tuna, aron makapadayon sa iyang trabaho isip peace consultant ug makaalagad sa katawhan, ilabi na ngadto sa mga trabahante sa plantasyon ug mag-uuma sa rehiyon sa Davao.