Labanan ti kapitalista a panagminas ken militarisasyon!

English

Nangisayangkat ti Agustin Begnalen Command NPA-Abra ti taktikal nga opensiba kontra iti 24th IB ti AFP, idiay Mount Basiwag, Barangay Gacab, Malibcong, tatta nga 27 Oktubre. Daytoy ket panagdusa iti 24th IB nga agserserbi nga puwersa pangseguridad para iti panagserrek ti kapitalista a panagminas iti Abra. Maikarkarintar ti proseso ti panangpalubos ti Large Scale Mining (LSM) Exploration Permit Application (EPA) ken Financial and Technical Assistance Application (FTAA) dagiti kumpanya a kas iti Cordillera Exploration Company Incorporated (CEXCI) kadagiti masakupan nga ansestral a daga ti Malibcong, Lacub, Tineg, Daguioman ken Licuan-Baay, inggana iti nagbeddengan ti Abra, Kalinga ken Apayao a paset ti Gran Cordillera mountain range.

Tapno maisegurado a maipatungpal daytoy a mananggamrud a proyekto, itultuloy ti Joint Task Force Tala ti AFP-PNP ti nabayagen a nalawa a “focus military operations” (FMO) kadagitoy a target nga erya. Panggep daytoy nga operasyon a pagulimeken, pasurenderen, ken pangtaan ti biag dagiti umili a kameng dagiti tribu ti Abra, Kalinga ken Apayao. Panggep ti AFP ken PNP a buraken ti panagkaykaysa ti umili tapno isigurado da nga awan ti oposisyon iti operasyon ti minas, dam ken geothermal a prayoridad a programa ti rehimen ni Ferdinand Marcos Jr. kakumplot dagiti imperyalista a pagilian.

Nakarkaro a pannakagamgam ti ansestral a daga, pannakailumlom iti kinakurapay, dislokasyon ti umili, didigra, ken pananglabsing iti karbengan-tao ti ipaay ti Large Scale Mining ken militarisasyon.

Sakbay ken kalpasan ti magnitude 7 a gingined a simangbay iti Abra idi Hulyo, addan ti napasamak a patraidor a panagtutulag ti Department of Environment and Natural Resources- Mines and Geosciences Bureau (DENR-MGB), CEXCI, National Commision on Indigenous People (NCIP) ken Local Government Unit (LGU) ti Abra tapno palubosan ti kadakkelan nga eksplorasyon ti panagminas iti Abra. Segun iti datos ti MGB idi pay 2021, rinugian ti CEXCI ti proseso ti panangala ti Free, Prior and Informed Consent (FPIC) kadagiti maseknan nga umili. Sinublat na daytoy nga EPA iti Newmont, idi pay dekada 1990. 132,192.26 ektarya ti saklawen ti CEXCI iti Malibcong, Daguioman, Licuan-Baay ken Balbalan ken Pasil, Kalinga iti uneg pay laeng ti EPA #14.

Kas panagsagana iti daytoy a panagminas, manarimaan ti construction ti Cordillera Road manipud iti Abra-Kalinga Road (partikular iti Malibcong, Abra) inggana Apayao. Nalawag iti umili a saan a para kadakuada daytoy a kalsada no di ket para iti panangminas ken napartak a panangipanaw iti mineral a kinabaknang ti umili.
Daytoy CEXCI ket nakapauneg iti Nickel Asia, a kukua da Zamora ken Virata, a kroni ti dati a diktador a Ferdinand Marcos Sr. Kasosyo na daytoy ti Sumitomo Metal Mining a kukua ti imperyalista a Hapon. Mapapati a ti kapital ti Nickel Asia ket naggapu iti makunkuna a tinakaw a kinabaknang ti pamilya Marcos iti umili a Pilipino.

Napaneknekanen iti kapadasan a ti dadakkel a panagminas wenno LSM ket awan pagnam-ayan ti umili. Ti agsagrap kadagitoy a kinabaknang a gamruden da ket dagiti ganganaet nga imperyalista, ni Marcos, dagiti kroni na, ken dagiti warlord-burukrata kapitalista nga adda iti turay.

Ti Nainkalintegan a Rebolusyonaryo a pannakidangadang ti Umili

Nayon ditoy taktikal nga opensiba tatta 27 Oktubre, nangisayangkat pay ti Agustin Begnalen Command NPA-Abra ti opensiba idi Hunyo 30, Hulyo 9, ken Agosto 18, iti paset ti Abra ken Apayao. Nagsagrap ti AFP ti lima (5) a natay a pakaibilangan ti maysa a tinyente. Dagitoy ket nalawag a mensahe nga iti kaanoman ket nakasagana ti Hukbo ken umili a labanan ti pwersa a pangseguridad dagiti gamrud a kumpanya ti minas, dam ken geothermal.

Sititibker a lablabanan ti umili ti panangidadanes ti LSM ken militarisasyon. Makipaspaset dagiti tribu, komunidad, ken umili iti daytoy a laban. Ti panangirupir da iti karbengan iti ansestral a daga ket paset ti rebolusyonaryo a tradisyon tapno salakniban daytoy para iti sumaruno a henerasyon.

Sititibker a labanan ti pananggamgam ti ansestral a daga!

Labanan ti kapitalista a minas, dam ken geothermal a proyekto!

Iyabante ti Demokratiko a Rebolusyon ti Umili!

Labanan ti kapitalista a panagminas ken militarisasyon!