Mabaskog nga ginakundenar sang Armando Sumayang Jr. Command-New People’s Army (ASJC-NPA) ang rehimen ni US-Marcos Jr, Armed Forces of the Philippines (AFP), kag Philippine National Police (PNP) sa pagpatay sang isa ka hors de combat sadtong Hulyo 30.

Biktima si Ka Tata sang ekstrahudisyal nga pagpamatay sang mga berdugo kag lunod-patay nga mga kriminal nga mga tropa sang 15th IB. Sadtong Hulyo 29, 2024, gindakop sang nasambit nga militar si Reggie Fundador (Ka Tata), sang naglakat siya pakadto sa Sityo Badjang, Barangay Camindangan, Sipalay City, Negros Occidental. Indi armado kag wala sang ikasarang nga magbato si Ka Tata kag tani kabigon na sang mga pasista nga tropa nga isa siya ka hors de combat sandig sa internasyunal nga laye sang gyera. Nabatian pa ang pagsinggit niya nga isa siya ka sibilyan sang gintayaan kag gilayon nga gindakop. Ang iya upod nakapalagyo kag ginlagas pagkatapos sang natabo nga krimen. Pagkadason nga adlaw, Hulyo 30, nakita ang patay nga lawas ni Ka Tata sa dalanon sang Crossing Magtanday, Barangay Camindangan, Sipalay City. Maathag ang agi sang pagtortyur sa iya lawas antes siya ginpatay.

Ginakasubo kag ginakaugot sang bilog nga rebolusyonaryo nga pwersa, mga Pulang Hangaway, kag sang Partido ang pagpatay sa mga uhaw sa dugo nga 15th IB kay Ka Tata, rebolusyonaryo nga pamatan-on kag kadre.

Si Regie Fundador (Ka Tata), 23 anyos, taga Sityo Makapula, Barangay Cabia-an, Candoni, Negros Occidental. Naghalin siya sa sahi nga mangunguma kag nagkomit nga mag-pultaym sa NPA sadtong 2020. Kilala si Ka Tata bilang isa ka mapinalanggaon nga kaupod. Mapisan siya sa pagpangita kag pagluto sang pagkaon para sa mga kaupod kag sa masa. Masupog kag puno sang kapagsik si Tata nga magpatuman sang iya mga tahas kag maisog man nga mag-atubang sa mga kaaway. Palakadlaw siya kag laka lang nimo makita nga masubo. Nangin kadre pulitiko-militar si Tata kag nagtungod bilang vice squad leader, team Leader kag sang ulihi, nagtungod sa hilikuton pinansya kag lohistika.

Ang utang nga dugo sang 15th IB batok sa pumuluyo kag sa kaupod dapat nga pagabayaran. Salabton kag dugang sa mga krimen ni US-Marcos Jr, AFP-PNP, kag sang NTF-Elcac ang pagpamatay sang mga hors de combat pareho kay Ka Tata kag sang madamo pa nga mga pumuluyo. Hustisya ang nagalanog nga singgitan sang pumuluyo kag sang bilog nga rebolusyonaryo nga pwersa.

Mangin sulundon sang mga pamatan-on ang nangin amot ni Ka Tata sa rebolusyon. Isa siya ka matuod nga rebolusyonaryo. Nakaugat na sa pamensaron kag tagipusu-on sang kada Pulang hangaway kag bug-os nga pumuluyo nga ila gina-alagaran nga mapatay man ang rebolusyonaryo, indi gid mapatay ang rebolusyon.