Nagapanginbulahan ang Partido Komunista sang Pilipinas sa pumuluyong Pilipino kag ila mga organisasyon masa kag mga alyansa sa higante nga mga protesta kahapon batuk sa korapsyon sang gobyerno sa idalum sang rehimen Marcos. Ang mga report nagapakita nga indi magnubo sa isa ka gatos ka libo ka tawo ang nagtililipon sa Luneta Park sa Manila, nga amo ang mayor nga bulto sang mga rali-protesta upod sa ginpamunuan sang simbahan nga pagtililipon sa EDSA, subongman mga dalagko kag gagmay nga mga hublag sa madamo nga kasyudaran kag mga probinsya sa bug-os nga pungsod.

Ang mga pangmasang demonstrasyon kahapon kag ang pila ka adlaw antes nga pagsaka sang numero sang mga aksyon-protesta may makasaysayan nga kapuslanan:

1. Gindumdom sang mga demonstrador ang ika-53 nga anibersaryo sang deklarasyon sang martial law. Nagapakita lang ini nga wala malipatan sang pumuluyong Pilipino ang pagpang-abuso sa gahum kag pagpangawat sa idalum sang 14-tuig nga diktadurya sang pamilya Marcos. Ang mga rali pamatuod sang ila determinasyon nga pamatukan ang legasiya sang korapsyon kag pagpang-ipit nga ginpanubli ni Marcos Jr.

2. Ang aksyon-masa kahapon kag pila ka semana antes, nagapakita sang lapnagon nga partisipasyon sang mga estudyante kag pamatan-on nga napamuklat sang pandemya kag pagka-utod sa social media kag pagkalulong sa barahubal nga korapsyon ni Marcos kag iya mga alipures. May nagataas subong nga rebelyon sang mga pamatan-on batuk sa burukrata-kapitalismo kag dunot nga nagahari nga sistema. Gin-ugyonan sila sang mga relihiyoso nga lideres kag mga grupo, komunidad sang mga imol nga taga-syudad, upod na sang mga biktima sang pagbaha, subongman mga propesyunal, mamumugon kag iban pa nga sektor nga indi na maagwanta ang malala nga sistema.

3. Ginpakamalaut sang mga nagprotesta si Marcos bilang Hari sang Korapsyon kag Pasismo, sa pagpatigayon kag pagpondo sang maanomaliya nga flood control kag iban pa nga proyektong imprastruktura, kabaylo sang pulitikal nga pagsuporta kag binilyon ka piso nga mga kikbak. Ginapakita sini nga lubos nga napaslawan ang iya tanan nga sistematiko nga padihot nga “kontra-korapsyon” nga Public Relation (PR) nga kampanya agud depensahan ang iya kaugalingon gikan sa kaakig sang pumuluyo – bisan pa sa pagbulig sang Akbayan kag iban pa nga naga-akomodar nga mga politiko nga ginbuhi ang plano sa pagpadalagan sa pagka-presidente ni Sara Duterte agud ipiton ang panawagan sang pumuluyo nga pasabton si Marcos.

4. Nabuyagyag ang pagka-kawatan ni Marcos sang mga report nga siya kag si Sara Duterte nakabaton sang minilyon nga “kontribusyon sa kampanya” gikan sa mga kontraktor, sang ulihi ginpadyaan sila sang dalagko nga mga kontrata sang gobyerno. Samtang nagatinguha si Marcos nga ibuyagyag ang mga Duterte nga nagbulsa sang binilyon nga kikbak gikan sa mga proyekto nga flood control, subong siya mismo nabuyagyag nga nakighimbon sa mga senador kag mga kongresista sa ila “ginapaboran nga mga proyekto” nga nagapakita sang pagpaguwa sang pondo halin sa Malacañang. Gamay na lang nga panahon nga magbulwak na ang mga protesta nga magdemanda sang pag-resign ukon pagpalayas kay Marcos, Duterte kag ila mga alipures tungod lubos na nga nadula ang pagsalig sang pumuluyo.

5. Ginhiwat ang mga demonstrasyon kag iban pa nga mga dagway sang aksyon sa bug-os nga pungsod, sa mga mayor nga kasyudaran kag mga sentro sang probinsya, nga naghakup sa pagpakigbahin sang puluan ka libo nga mga ispontanyo gikan sa tanan nga sektor kag pang-idaron. Sa maabot nga mga binulan, ang mga aksyon masa magalapnag bisan pa sa mga lugar sa kaumhan, ilabi na sa mga lugar kon sa diin nagakatabo ang grabe nga pagbinaha nga gintuga sang indi maayo nga pagplano sa pagtukod sang mga imprastruktura para sa kikbak. Ining mga ginatawag nga mga “proyektong pangkauswagan” magahatag ligwa kag magapalapad sang mga plantasyon kag operasyon sa pagmina, mang-agaw sang kadutaan, mangkawkaw sang kapalibutan kag magtuga sang grabe nga pag-antus sa minilyon ka pumuluyo.

6. Samtang nagahingapos ang mga pamulong-pulong sang mga organisado nga mga ralyista sa Mendiola, may grupo sang pila ka gatos ka mga pamatan-on, kalabanan wala sang trabaho nga pumuluyo, gikan sa sahing mamumugon nga mga komunidad, ang nagguwa sa kubay sang mga ralyista kag nagsugod nga manghaboy sang mga bato sa mga pulis, ginpangwasak ang mga billboard kag nagtutod sang kalayo sa Recto Avenue. Amo ini ang ila pamaagi sa pagpabutyag sang ila kaakig kag pagpakigbato batuk sa mga pasista nga pulis nga nagaprotektar kay Marcos kag iya mga hubon nga mga kawatan sa gobyerno. Amo man ini nga mga pulis ang bantog sa pagpang-lockdown sa mga komunidad kag pagpang-abuso sang mga pigos nga pamatan-on. Sa mando ni Marcos nga silutan ang mga nagprotesta, gingamitan sila sang mga pasista nga pulis sang brutal nga pwersa kag pagpangsumpo, arbitraryo nga ginpang-aresto ang mga duha ka gatos ka mga nagprotesta, nga madamo ang nakaagum sang mga kapilasan gikan sa pagpangkastigo sang pulis. Ining akto sang pagpangsumpo magabulig lang dugang pasagrab sang espirito sang pamatan-on para sa makatarunganon nga rebelyon. Desperado ang dagway sang ila pagpamatuk kahapon sa Mendiola, apang nagapakita ini sang ila kaisog sa pagpamatuk sa mga kamatayon, pag-antus kag kalakasan nga gintuga sang korap kag pasista nga estado sa ila kag ila mga pamilya. Paagi sa pulitikal nga edukasyon, madasig nila mareyalisar ang kakinahanglanon sang militante nga organisado nga pagpamatuk, kag rebolusyonaryong bayolensya bilang pamaagi sa pagpakig-away sa pasistang estado nga bayolensya.

7. Ang higante nga demonstrasyon kahapon senyales sang mabaskog nga liwat pagbulwak sang kahublagan masang protesta upod sa pungsodnon demokratikong pwersa bilang ubod. Amo ini ang mga pinakadako nga demonstrasyon halin sang 2013 nga mga protesta batuk sa gobyernong Aquino 2 angot sa isyu sang pork barrel kag ang Marcos No Hero nga mga protesta sang 2016. Ining liwat nga pagbulwak tuman ka signipikante tungod bunga ini sang wala-puas nga pagtinguha sang pwersa pangseguridad sang estado nga sumpuon, harason, Red-tag kag mapintas nga atakehon ang mga lider-masa kag mga aktibista sang nagligad nga pila na ka tuig. Ang higante nga mga demonstrasyon produkto sang obhetibong kahimtangan sang pang-ekonomiya kag pang-pulitika nga krisis, kag ang matutom nga trabaho sang mga patriyotiko kag demokratikong organisadong mga pwersa. Bisan pa sa atubang sang mapintas nga pagpangsumpo sang estado, nagpanikasog sila nga pukawon, organisahon kag pahulagon ang pumuluyo kag tukuron ang malapad nga mga alyansa kag mga network, agud mapasulong ang handum sang pumuluyo para sa hustisya sosyal kag matuod nga demokrasya.

8. Ang katuyuan sang peke nga imbestigasyon ni Marcos amo nga tabunan ang matuod nga kalalaon sang korapsyon kag iya direkta nga kahilabtanan sa sining yawan-on nga aktibidad sang burukrata-kapitalista kag mga sindikato. Kon mas maglikaw si Marcos nga mabuyagyag, mas pa niya ginatulod ang pumuluyo nga magkadto sa dalanon. Ang pagbulwak sang kontra-korapsyon nga kahublagan sang pumuluyo mas nga magasingki pa sa maabot nga mga semana kag binulan. Kag mismo si Marcos amo na ang puntiryahon sang mga protesta sang pumuluyo.

9. Ang lapnagon nga mga protesta magatipon sang tuman nga kusog nga magakambyo padulong sa higante nga pag-alsa sang pumuluyo para pukanon ang mga Marcos kag mga Duterte kag tanan nila nga mga alipures sa korapsyon gamit ang ila poder. Makaduha na ka beses nga gin-ehersisyo sang pumuluyo ang kasubong nga kusog, sa pag-alsang EDSA sang 1986 kag 2001. Dapat maghanda ang pumuluyong Pilipino sang kasubong sini nga palaabuton. Dapat man sila magtuon sa mga nagligad nga mga inagihan kag pirme handa nga makig-away para sa matuod nga hustisya kag malapad nga demokrasya agud matugutan sila nga ma-ehersisyo ang ila kusog para pakig-awayan ang korapsyon kag pagpang-abuso, tubtob nga makatipon na sila sang bastante nga kusog para pukanon ang bug-os nga sistema.

10. Ang nagataas nga mga protesta nagalaragway sang tudok sa tul-an nga pagkadiskuntento sang pumuluyong Pilipino sa atubang sang pang-ekonomiya kag pang-pulitika nga krisis nga ginaatubang sang nagaharing sistema. Manipestasyon ini sang lapnagon nga sentimyento sang malapad nga masa sang pumuluyo nga nagaantus tungod sa korapsyon kag nagalala nga kahimtangan sang mala-kolonyal kag mala-pyudal nga sistema. Sa tunga sang nagalala nga sosyal nga krisis, ang mga pigos nga mga sektor sang sosyedad Pilipino aktibo nga nagasabat sa panawagan nga tapuson na ang imperyalismo, pyudalismo kag burukrata kapitalismo, kag maghimakas para sa pungsodnon nga demokrasya.

11. Ang aksyon-masa sang September 21 kabahin sang nagataas nga rebelyon sang mga pamatan-on kag katawhan sa kalibutan. Nagakuha sang inspirasyon ang pamatan-on nga Pilipino sa sini lang nga mga demonstrasyon sang mga pamatan-on sa pungsod Indonesia kag Nepal, kag sining temprano lang, sa Kenya kag pila pa ka pungsod sa Africa, nga amo man gihapon nga isyu sang korapsyon sa gobyerno sang mga matag-as nga mga burukrata, grabe nga sosyal nga indi pag-alalangay, grabe nga mga inhustisya kag pulitikal nga pagpangsumpo. Ang September 21 nga demonstrasyon kag ang nagataas nga kahublagan batuk sa burukrata kapitalismo magahatag man sang inspirasyon kag magatulod sa pamatan-on kag pumuluyo sa kalibutan nga mag-alsa batuk sa ila nagapang-abuso sa gahum, mga manugpigos kag manughimulos.

12. Ang mga protesta batuk sa korapsyon mas magaganar pa sang mabaskog nga kusog samtang madamo pa nga sektor ang magapakigbahin, ilabi na ang mga mamumugon, mga masang mala-proletaryado nga wala sang trabaho sa mga komunidad, kag mga masang pesante sa kaumhan. Sila ang nagabug-os sang mayoriya sang pumuluyo. Pat-od nga madamo sa ila ang mag-alsa samtang padayon sila nga nagapakig-upod sa mga pang-kultura kag pang-edukasyon nga mga aktibidad nga ginaangot sa matingkad nga mga isyu sang burukrata kapitalismo kag korapsyon sa ila kongkreto nga mga problema sang manubo nga sweldo, kawad-on sang trabaho, pagpang-agaw sang duta, kag pang-ekonomiya nga kawad-on.

13. Ang mga estudyante kag mga pamatan-on padayon nga maga-uyat sang papel sa subong nga pagbulwak sang mga protesta. Agud makatipon sang kusog, dapat mag-guwa sila sa ila hulot-buluthuan, magtuon sa masa, kag makig-isa sa mga pumuluyo sang imol nga mga komunidad kag mga paktorya sa kasyudaran. Dapat man sila magkadto sa mga lugar sa kaumhan agud may masangkad sila nga panglantawan sang kahimtangan sang sosyedad Pilipinas. Dapat sila mag-imbestigar kag sila mismo dapat makakita, sa kongkreto, sang kahalitan nga gintuga sang dunot nga burukrata kapitalista, ginakontrol sang imperyalista kag atrasado nga mala-pyudal nga sistema. Sa paghimo sini, ila matransporma ang ila intelektwal nga kaakig batuk sa korapsyon padulong sa lubos kag pangmalawigon nga komitment nga alagaran ang pumuluyo kag makig-away para sa ila handum nga kahilwayan kag demokrasya.

14. Labaw pa sa pagpasabat sa mga Marcos, mga Duterte kag tanan nga mga kriminal sa korap nga estado, ang aksyon-protesta kahapon kag sang nagligad nga semana maathag nga nagapangita sang pagbag-o sa nagahari nga burukrata kapitalista kag neokolonyal nga rehimen. Ang ila demanda sa pagbag-o sang sistema amo ang indi mabalewala nga kamatuoran sang paborable nga mga kondisyon sa paglunsar sang pungsodnon demokratikong paghimakas sa Pilipinas. Ang lapnagon nga mga protesta labi pa nga nagpalig-on sa panindugan sang mga rebolusyonaryo. Dapat sila pursigido nga magtrabaho sa paghiwat sang mga pulitikal nga edukasyon kag pagpalapad sang ila mga likom nga rebolusyonaryong organisasyon sang Pungsodnon Nagahiliugyon nga Prente. Ang mga Pulang hangaway sang Bagong Hukbong Bayan (BHB) inspirado man sa mga aksyon-masa kag labi pa nga determinado nga maglunsar sang inaway banwa agud malab-ot ang handum sang pumuluyo para sa rebolusyonaryong pagbag-o.