Sama-sama at lubos na kasiyahan nating ipinagdiriwang ang ika-52 anibersaryo ng National Democratic Front of the Philippines. Itinatanghal natin at ipinagbubunyi ang mga nakamit na tagumpay ng NDF sa mahigit limang dekadang pagbubuklod sa sambayanang Pilipino laban sa imperyalismong US, pyudalismo at burukrata kapitalismo. Mula nang itatag ang NDFP noong Abril 24, 1973, gumampan ito ng mahalagang papel sa pakikibaka ng sambayanang Pilipino para sa pambansang pagpapalaya, demokrasya at sosyalismo.

Binabati rin ng NDFP-Palawan ang mga kasapi ng mga alyadong pambansa demokratikong organisasyon sa probinsya hanggang sa buong bansa sa matatag at patuloy na pagpupunyagi na isulong ang programa ng NDFP sa harap ng pinatinding paninibasib ng rehimeng US-Marcos II sa mamamayang nakikibaka at tumitinding panghihimasok ng imperyalismong US sa bansa. Sa probinsya, partikular ding ipinagdiriwang ang pagkakabuo ng Supok, ang rebolusyonaryong samahan ng mga pambansang minorya sa Palawan na nagsusulong ng programa para sa katugunan ng daan-taong problema ng mga katutubo sa probinsya.

Dahil sa estratehikong lokasyon, kabilang ang Palawan sa mga pangunahing isla o probinsya na tinututukan ng imperyalismong US para sa paghahanda nito sa nilulutong gera laban sa imperyalistang karibal na China. Hindi ligtas ang probinsya sa saklaw ng Balikatan Exercises ngayong taon upang patindihin pa ang interbensyong militar ng US, tulad ng mga pakitang-taong operasyong sibil-militar sa mga sibilyang komunidad sa isla. Tinatawid ng mga barkong pandigma ng US ang mga karagatan sa pagitan ng mga isla tulad ng Balabac Strait. Dumikit ang mga barko sa mga pinag-aawayang teritoryo, tulad ng Paracel Islands at Scarborough Shoal, at umakit ng dagdag na presensya ng mga barko at eroplanong Chinese. Saklaw din ang Balabac Strait sa sinasarbey ng mga barkong pinatatakbo ng US Navy. Iniulat din ang mga unmanned aerial vehicle tulad ng MQ-9 Reaper UAV na nakabase sa Clark Airbase at sa Palawan sa ilalim ng Task Force-Ayungin ng US.

Isinasalaksak ng imperyalismong US sa isip ng mamamayang Pilipino na ito ay “kaibigan, katuwang at alyado” ng sambayanang Pilipino, habang pinagtatakpan ang walang-habas na pagyurak sa kasarinlan ng bansa. Kinakasabwat ng imperyalismong US ang rehimeng US-Marcos upang gatungan ang Sinophobia o sentimyentong anti-China sa bansa at maging sa probinsya. Tinutuntungan, sinasamantala at pinalalaki ng mga papet at tauhan ng US sa Pilipinas ang sigalot sa pagitan ng China at Pilipinas sa West Philippine Sea at maling itinutumbas ito bilang “pananakop sa teritoryo ng bansa” gayong maaari sanang lutasin sa diplomatikong paraan ang tunggalian at pagtatanggol sa soberanong karapatan ng Pilipinas. Kabilang din sa kamakailang iskema ng mga tagasulsol na maka-US ang pang-uudyok ng National Security Council na kumalas ang Palawan sa mapagkapatirang relasyon nito sa China, sa pagpapaypay sa mga diumano’y insidente ng pang-eespiya ng China sa bansa gamit ang mga “ahente” at surveillance drones at sa diumano’y pagpapatakbo ng China ng mga lokal na papet nito sa bansa ngayong parating na burgis na eleksyong 2025. Pinakahuling pasabog ang pagbabalita ng “pagkubkob” ng China sa Sandy Cay sa WPS.

Patuloy na ibinebenta ng US ang napakaganda at kabigha-bighaning kalikasan ng Palawan sa mga dayuhang malalaking kapitalista sa ngalan ng pagpapalakas ng turismo at ekoturismo. Nitong Abril 22 lamang, inilabas nito ang taunang listahan nito ng pinakamagandang bisitahing isla sa buong mundo, at pinangalanan ang Palawan bilang World’s Best Island to Visit. Tiyak na matapos ito, lalong bubuhos ang mga proyektong pang-imprastraktura at mga negosyong resort ng malalaking burgesya kumprador sa mga lugar na kalapit ng mga tinukoy na pook eko-turismo.

Sa harap ng pinatinding panghihimasok at pinahigpit na kontrol ng imperyalismong US sa Pilipinas, dapat patuloy pang palakasin ang NDFP, ang iba’t ibang alyadong organisasyon sa ilalim nito sa probinsya at ang patriyotikong prente ng sambayanang Pilipino para palaganapin ang paninindigan para sa pambansang kalayaan, demokrasya at sosyalismo. Natututong makibaka ang mula sa iba’t ibang uri at sektor sa Palawan, sumisigla ang pakikibakang masa sa probinsya, namumulat sila at nagbibigkis para buuin ang nagkakaisang lakas ng kanilang pagkilos sa iba’t ibang anyo ng mga protesta at paglaban sa mga proyekto at negosyong yumuyurak sa kanilang karapatan sa buhay, lupa, kabuhayan, panirikan, at kalikasan.

Ngayong taon, pumabor sa malawak na kilusang masa kontra-mina sa probinsya ang ilang lokal na pulitiko at dinala sa Sangguniang Panlalawigan ang rekomendasyon para ipatupad ang kautusan ng pagbabawal sa pagmimina sa buong Palawan. Sa pagsisikap ng mga mamamalakayang Palaweño, kaisa ang iba pang mga progresibong grupong makakalikasan at taong-simbahan, na maghain ng temporary environment protection order (TEPO) upang pigilan ang patuloy na pagpasok ng mga commercial fishing vessels sa 15-kilometrong munisipal na pangisdaan dahil sa idinudulot nitong malubhang banta sa kalikasan at yamang-tubig ng isla, at sa kabuhayan ng maliliit na mangingisda.

Higit sa lahat, dapat mag-ambag ang masiglang parlamentaryong pakikibakang ito sa pagsusulong ng armadong pakikibaka sa Palawan. Ang pinakamalaking tungkulin ngayon ng NDFP sa panahon na tayo ay nasa kilusang pagwawasto ay ang gawin ang lahat para sa pagsusulong ng matagalang digmang bayan, laluna ang pagpapalakas ng BHB at pagpapanibagong sigla ng armadong pakikibaka’t rebolusyonaryong kilusang masa sa kanayunan. Ang rebolusyonaryong armadong pakikibaka ng sambayanang Pilipino ang pangunahin at pinaka-epektibong anyo ng paglaban para sagkaan ang imperyalistang gera na inuupat ng US, at para kamtin ang pambansang kalayaan at demokrasya. Kaugnay nito, kailangang gawin ang buong makakaya ng bawat alyadong organisasyon ng NDFP-Palawan at lahat ng nagmamahal sa bayan na iambag ang pinakamahuhusay na anak ng bayan sa Bagong Hukbong Bayan. Sa pamamagitan nito, mabubuo natin ang pangunahing lakas sa pagsusulong ng armadong pakikibaka upang gawing posible ang pag-agaw sa kapangyarihang pampulitika mula sa kamay
ng mga kaaway ng sambayanan.

Maaasahan na gagawin ng NDFP-Palawan ang anumang dapat nitong gawin para isulong at ipagtagumpay ang rebolusyon tungo sa makatarungang kapayapaan ng pambansang kasarinlan, tunay na demokrasya, kaunlarang pang-ekonomya sa pamamagitan ng reporma sa lupa at pambansang industriyalisasyon at katarungang panlipunan. Habang lumalala ang krisis ng naghaharing sistema sa bansa at ang krisis ng pandaigdigang sistemang kapitalista, lalong nalilikha ang paborableng kundisyon para imulat, organisahin at pakilusin ang mamamayan sa pagsusulong ng rebolusyon. Hahawanin ng pagtatagumpay ng demokratikong rebolusyong bayan sa Pilipinas na may sosyalistang perspektiba ang isang lipunan na tunay na malaya, demokratiko, masagana at makatarungan.

Mabuhay ang National Democratic Front of the Philippines!
Isulong ang armadong pakikibaka!
Mabuhay ang rebolusyon at sambayanang Pilipino!