Mabaskog nga ginakondenar sang Leonardo Panaligan Command-New People’s Army ang wala kaluoy nga pagmasaker sa mag-amay nga mga mangunguma nga sanday Gudofredo Templatura, 70 anyos kag John Albert Templatura, 32, anak ni Gudofredo, may asawa kag kabataan tanan residente sang Purok Sab-a, Barangay Montilla, Moises Padilla, Negros Occidental pasado las 4:00 sang hapon, Enero 2, 2024. Bangud sang patarasak nga pagpaniro nagresulta man sa pagkapilas sang duha pa ka iban nga sanday Marites Rafols kag Jessel Abaño sang amo gihapon nga lugar.

Sa inisyal nga pagpangusisa sang LPC-NPA, responsable sa pagmasaker sa mga biktima si CAFGU Donan Sosia, aktibo nga katapo sang CAFGU idalom sa 62nd IB Patrol Base sa Barangay Alingasaw, Moises Padilla. Nagluntad ang pagmasaker sa mag-amay Templatura matapos ang pinamilya nga komosyon samtang nagaselebrar si Albert Templatura sang iya nga kaadlawan.

Sa pinamilya nga komosyon, ginakabig nga pribado ang pagresolbar apang kon indi na masarangan sang mga natungdan, may kinamatarung ang Barangay Tanod ang magresponde paagi sa mando sang Barangay Kapitan. Kon indi pa gid masarangan sang LGU, papel na sang Philippine National Police (PNP) para ipaluntad ang kalinong kag katawhay sa lugar.

Wala sang kinamatarung ang CAFGU nga magresponder nga naga-isahanon kag armado pa kon wala sang mando halin sa iya superyor. Wala man nagapati ang LPC-NPA nga si CAFGU Donan Sosia lamang ang mangatubang sini nga kaso. Matuod nga direkta nga ginkomiter ni Sosia ang pagmasaker gamit ang iya armas, apang napaidalum ini sa command and control sang 62nd IBPA sa pagpanguna ni L/Col. William Pesase Jr-62nd IBPA Commanding Officer.

Wala rason si Sosia nga magpakamartir. Kinahanglan nga magkooperar si Sosia. Magsugid sang matuod sa publiko kon sin-o pa ang iya mga kaupdanan kag sin-o ang ila superyor nga nagmando sa ila agud himuon ini nga krimen. Wala man sang rason ang 62nd IB nga himuon nga tapalan si Sosia. Mas dako ang salabton ni L/Col.William Pesase Jr ang command responsibility sa sini nga pagmasaker nga nagresulta sang kamatayon sang mag-amay nga Templatura kag pagkasamad sang 2 pa nga iban.

Ginamanduan sang Leonardo Panaligan Command-New People’s Army ang yunit sang NPA malapit sa lugar sang insidente sa isa ka maid-id nga imbestigasyon. Ihatag ang nagakaigo nga hustisyà sa pamilya sang mga biktima kag pasabton ang mga perpetrators sa likod ni CAFGU Donan Sosia.###