• Pfc. Tino Patay sa Isnayp-Haras sa NPA-SDS

Patay sa pagpang-isnayp haras sa usa ka tim sa NPA-SDS si PFC Roger Tino, taga Purok 2, Ban-as, Lianga, Surigao del Sur kaniadtong buntag sa Mayo 3, 2022 didto sa bukirong bahin sa Diatagon, Lianga, Surigao del Sur. Hangtod karon nagpadayon ang Combat Military Operation sa 3rd Special Force Battalion, kun asa napailalom si PFC Tino dinhi, sa pagsuhid sa mga kabukiran nga langkob sa erya niini sa ilang operisyon aron “pukanon” ang NPA ug rebolusyonaryong kalihukan sa lugar.

Hangtod karon walay gipagawas nga pamahayag sa midya ang kaaway lambigit sa pagkamatay ni Tino. Paryente na sa napatay ang nag-istorya sa maong panghitabo.

• Sibilyan Gipusil-Patay sa 67th IPBA

Gipusil-patay sa mga wala mailhing ahente sa 67th IBPA si “Lolong” Magallanes, 50, minyo, didto atbang sa iyang payag sa bukid sa sityo Mamparasan, barangay San Roque, Bislig City, Surigao del Sur kaniadtong Mayo 6, 2022 sa may alas 7:00 sa gabie.

Napuno ug natadtad sa bala sa shotgun, .45 kalibreng armas ug M16 ang lawas ni Lolong ug nabuak usab ang ulo niini.

Kaniadtong Abril 22, 2022 nakadawat na ang biktima og mga tawag pagpangbahad gikan sa inteledyens sa tropa sa 67th IBPA. Pugos siya gilambigit nga siya ang kontak ug nagsuplay sa mga NPA nga naengkwentro sa 67th IBPA kaniadtong bulan sa Abril 4, 2022 nga nagresulta sa usa ka patay sa kaaway. Niadtong higayona nagkatinubagay si Lolong ug ang inteledyens sa selpon.

Ang pagduda sa kaaway nga aduna kini linya sa NPA tungod sa anaa kini paryente sa Pulang hukbo nga namartir na. Ug gani pagkusog sa Community Organizing for Peace and Development (COPD) sa ilang lugar isa siya sa mga sibilyan nga pugos gipasurender sa kaaway isip NPA.

Isa lang si Lolong sa mga libuan ka mga inosenteng sibilyan nga nabiktima sa brutal nga pagpamatay ilalom sa kontra-insurhensya kabangis sa rehimeng US-Duterte ug sa AFP/PNP. Mas gipasamot pa kini sa daan ng kabangis sa estado ang pagpalig-on sa Anti-Terror Law (ATL), nga samot pang maglegalisa sa dinaghang pagpanglapas sa tawhanong katungod sa Pilipino.

Hangtod pabor sa nagharing hut-ong ang sistema sa hustisya sa Pilipinas, magpabiling walay tinuod nga hustisya ug kaangayan ang katawhang Pilipino. Maong alang sa masa kinahanglan padayon natong iduso ang atong mga katungod sibil ug katungod sa pulitika, dili angayang ikahadlok ang padayong walay puas nga paglapas sa tawhanong katungod sa estado ngadto sa katawhan. Mas maaghat kita nga mobarog ug mosukol tungod kay pinaagi lamang niini mapadaog nato ang Demokratikong Rebolusyon sa Katawhan nga maoy magsilbing dalan aron magwagtang sa pila na katuig nga walay hustisyang pagpangpatay ug pagpanghadlok sa nagharing hut-ong ngadto sa katawhang Pilipino.