Ang hambalanon sa pag-istoryahanay sa kalinong sa tunga sang National Democratic Front of the Philippines (NDFP) kag Gobyerno sang Republika sang Pilipinas (GRP) nagapabilin nga wala sang katumanan. Indi sinsero ang rehimen ni Marcos Jr nga hatagan sang igtalupangod ang matuod nga ugat kag solusyon sang problema sang pungsod. Determinado ang iya rehimen nga ipatuman ang plano nga tapuson ang rebolusyonaryong kahublagan nga ginasulong sang bug-os nga pumuluyong Pilipino sa pagpamuno sang Communist Party of the Philippines (CPP).

Mismo si Gen.Eduardo Año nga upisyal sang National Security Council (NSC) nagpahayag sang iya pagpamalabag sa peace talk. Nagapakita lang ini sang iya tuta, militarista kag utok pulbura para ideskaril ang pag-istoryahanay sa kalinong kag hatagan ligwa ang pagpadayon sang patakaran sang gyera kag terorismo batok sa pumuluyo nga nagahandom sang matuod nga kahilwayan kag demokrasya.

Sa kasaysayan, pila na ka rehimen ang nag-agi nga wala sang seryoso nga pag-istoryahanay para sa pundamental nga hambalanon agud sabton ang lehitimo nga mga demanda sang pumuluyo para sa makatarungan kag pangmalawigon nga kalinong paagi sa pagpatuman sang matuod nga reporma sa duta kag pungsodnon nga industriyalisasyon.

Ang rehimen Marcos II padayon nga nagapatuman sang lapnagon nga pagpangwasak sang palangabuhian kag kabuhi sang malapad nga pumuluyo, paagi sa pagpatuman sang neoliberal nga patakaran sa mando sang imperyalismong US. Madata ang pagpang-agaw sang mga kadutaan halin sa kabukiran tubtob sa kasyudaran para sa mina, plantasyon agrikultural, ekoturismo kag reklamasyon nga naga-dislokar sang libo-libo nga mga pumuluyo.

Hayagan nga ginapangharas ang mga pumuluyo nga nagapamatok sa mga proyekto sang mga dumuluong kapitalista, dalagku nga burgesya komprador kag agalon may duta paagi sa paggamit sang armado nga kusog sang estado kag mga ahensya sini. Madamo na nga kabuhi sang pumuluyo ang nahalad sa pagpakig-away batok sa mga proyekto.

Wala man sang pag-ulikid ukon kabalaka ang rehimen US Marcos II sa ginapas-an nga kalbaryo sang malapad nga pumuluyo nga nalubong sa grabe nga gutom kag kapigaduhon. Kadam-an ang wala klaro nga trabaho, nagabaton sang maka-ulipon nga sweldo kag indi makalagas sa madasig nga pagsirit sang presyo sang mga balaklon.

Naga-alburuto na sa kaakig ang tanan nga mga sektor ilabi na ang mga mamumugon kag mangunguma bangud wala sang klaro nga solusyon sa kapigaduhon ang rehimen ni Marcos Jr. Sa baylo, ang pagpanglugayawan sa iban nga pungsod kag pagbaligya sang soberanya sa Pilipinas kag pagkamasa sang dalagku nga kantidad gikan sa kaban sang gobyerno ang ila ginahimo para sa ila kapritso.

Determinado ang pumuluyong Negrosanon nga isulong ang paghimakas tubtob sa mataas nga lebel tungod wala sang iban nga makasulbar sa ginaatubang nga problema kundi ang ululupod nga pagbato.

Ang paglunsar sang armado nga paghimakas amo ang solusyon sa pundamental nga problema sa isa ka mala-kolonyal kag mala-pyudal nga sosyedad. Mismo ang reaksyonaryo nga estado amo ang numero uno nga tig-rekrut sang mga mamumugon kag mangunguma kag iban pa nga mga sektor nga magpakigbahin sa armado nga paghimakas para pukanon ang rehimen US-Marcos II nga isa ka terorista, paantus,korap kag kawatan.

Nagapanawagan ang PKM-Negros sa bug-os nga mangunguma kag mga demokratikong sektor nga ululupod nga iduso ang US-Marcos nga rehimen nga ipadayon ang negosasyon sa kalinong agud solbaron ang ugat sang problema sang gyera sibil sa pungsod, nga mayormente ang kawad-on sang duta nga ulumhan sang malapad nga mangunguma kag ang paghigot sang ekonomiya sang pungsod sa dumuluong monopolyong kapitalista.