Naimpusuan a pannakipagrikna kadagiti naulila a kapamilya, kakadua ken gagayyem ti idandanun ti NDF-Ilocos iti ipupusay ti patpatgen tayo a mangidaulo a nangbuangay ti Partido Komunista ng Pilipinas, ni Ka Jose Maria Sison.

Kasla nagsardeng ti lubong iti pannakadamag ti NDF-Ilocos iti ipupusay ti kadua idi rabii ti Disyembre 16 bayat a nakaidalit iti ospital idiay Utrecht, Netherlands. Nupay kasta, iti laksid ti nalabes a panagladingit, natibker kami a tumaktakder ken determinado nga ituloy ken iyabante ti naindaklan a panggep ni Ka Joma a wayawayaan ti umili a Pilipino, karaman ti maidadanes a masa nga anakling-et iti sangalubongan manipud iti panangilupit-lupit ti imperyalismo ken dagiti gamat daytoy nga agar-ari a dasig dagiti kapitalista ken apo’t daga iti nadumaduma a paset ti lubong.

Ni Ka Jose Maria Sison, a tubo iti Cabugao, Ilocos Sur ket ipagpannakkel dagiti kakadua ken masa nga Ilokano iti panangidaulo na iti rebolusyonaryo a dangadang ti umili a Pilipino ken napasnek a panagtulong iti dangadang ti proletaryado ken masa nga anakling-et iti intero a lubong, iti laksid ti nabaknang a dasig a nagtaudan na.

Ni Ka Joma ket nagtaud iti mestiso a kaputotan ti apo’t daga nga Espanyol-Mehikano ken Tsino a dimmayo iti Ilocos ken nagturay ditoy idi panawen ti kolonyalismo nga Espanyol. Ti apong na iti tumeng a ni Don Leandro Serrano ti kabaknangan nga apo’t daga ti Amianan a Luzon idi maika-19 siglo ken ti apong na a ni Don Gorgonio Soller Sison ket nagbalin a gobernadorcillo (mayor) ti Cabugao idi panawen ti kolonyal a panagari ti Espanyol. Ti uliteg na iti tumeng a ni Don Marcelino Crisologo ti nagbalin nga umuna a gobernador ti Ilocos Sur ken ti uliteg na a ni Teofilo Sison ket nagbalin a gobernador ti Pangasinan.

Ngem gapu iti pannakariing na iti Marxista nga ideolohiya ti kinaawan-panagimbubukod, pinanawan na ti kinabaknang ti nagtaudan na a dasig. Imbes nga usaren na para iti panaggundaway tapno agpabaknang, dagiti daga a tawid ni Ka Joma ket inpaima na kadagiti mannalon. Ken imbes nga ituloy ti panagturay iti pulitika iti Ilocos ti kaapuan na ken usaren daytoy para iti interes ti agar-ari a dasig, nakipagbiag isuna iti masa a mangmangged ken nakurapay iti syudad ken iti mannalon iti kaaw-awayan. Naanep nga inadal na ti kasasaad da, riniing ken inorganisa na isuda para iti armado ken demokratiko a rebolusyon. Siasino kadagiti babaknang nga agtuturay iti gimong a Pilipino ti makaar-aramid ti aktwal a pannakipagbiag kadagiti marigrigat a dasig tapno itandudo ti interes da, nu saan a dagiti kakadwa a nariing iti proletaryo a takder a kas ken Ka Joma? NI Ka Joma a nagadal ken nagturpos kas maysa a propesor iti burges a pagadalan ket nagbalin a proletaryo nga estudyante ken manursuro ti minilyon a masa a Pilipino ken dagiti masa nga maidadanes iti nadumaduma a paset ti lubong babaen ti naanep a panagisursuro na kadagiti Marxista-Leninista-Maoista a prinsipyo. Nasirib nga inusar na dagitoy a teorya iti panangsukimat kadagiti sakit ti malakolonyal ken malapyudal a gimong a Pilipino, ken ti kinabulok ken turongen ti monopolyo kapitalista a krisis iti sangalubongan tapno iyabante ti nalian demokratiko a rebolusyon ken internasyunal a proletaryo a rebolusyon. Daytoy ket tapno rebbeken ti imperyalismo a numero uno a kabusor ti umili iti sangalubongan ken pagturayen ti sosyalismo agingga iti komunismo.

Gapu iti panagpinget na, balligi a balbaliw a naibangon ti Partido Komunista ng Pilipinas, idi Disyembre 26, 1968, nga agingga ita a maika-54 a tawen nan, ket natibker latta a mangidadaulo ken tumaktakder a pinakamapagpiaran a mangitantandudo iti interes ti masa a Pilipino, iti laksid ti awan-sarday a gagem ti kabusor a parmeken daytoy. Iti kinapursigido na. indauluan ni Ka Joma ti panangibangon ti Bagong Hukbong Bayan tapno maaddaan ti sangi ti dangadang ti umili a Pilipino laban iti kinaranggas ti agar-ari a dasig ken ti pasista nga armado a puersa da. Indauluan na ti panangitakder ti Nailian Demokratiko a Nagkaykaysa a Prente tapno mareppet ti bileg ti mayorya a masa a mannalon ken mangmangged tapno maduprak ti bileg ti agar-ari a dasig ken maipagballigi ti baro a demokratiko a rebolusyon ti umili a Pilipino ken ad-adda pay nga iyabante daytoy ti sosyalista a rebolusyon.

Iti laksid dagiti panangpadakes ti agar-ari a dasig ken dagiti pasista a gamat da babaen ti panangnagan kenkuana kas terorista, ni Ka Jose maria Sison ket kampeon ti pudno a kappia. Mapaneknekan daytoy iti napinget a panangitandudo na iti saritaan iti kappia ti NDFP ken GRP (Gubyerno ti Republika ti Pilipinas) tapno risuten dagiti ramut ti armado a risisris ditoy pagilyan, nu sadinno nga idadauluan na ti panangidatag kadagiti gakat para iti kumprehensibo a solusyon dagiti sosyo-ekonomiko a krisis iti Pilipinas.

Katkatawaan laeng dagiti kakadua ti pablaak ti sekretaryo ti Department of National Defense Jose Faustino Jr. nga iti ipupusay ni Ka Joma ket sigurado a mareggaayen ti CPP-NPA-NDF ken ti rebolusyon, isu nga rumbeng laeng a sumuko tayon. Ti sungbat ti NDF-Ilocos ditoy ket siento porsiento a kamali ni Faustino, gapu ta iti ipupusay ni Ka Joma ket adu ti kakadwa a mangituloy iti narugian na, ken agingga a ti umili ket naidasay iti kinarigat, panangidadanes, korapsyon ken umun-uneg a krisis iti kagimongan nga ituntunda ti imperyalismo, burukrata kapitalismo ken pyudalismo, umabante ti rebolusyon. Ti NDF-Ilocos ken ti masa nga Ilokano ket saan a maup-upay nu di ket ad-adda nga gumilgil-ayab ti naindasigan a rurod ken rebolusyonaryo a pakinakem mi tapno ad-adda pay nga agpinget ken iyabante ti armado ken demokratiko a dangadang ditoy rehiyon.

Bayat a lumlumdaang kami, nakaitag-ay ti gemgem mi a mangpadpadayaw iti kinabanwar ti kailian ken kabagian mi, ken kadua tayo a Jose Maria Sison, iti panangidaton ti biag, pigsa ken sirib na manipud idi agkabanwag agingga iti panagrakaya ken ipupusay na, iti panangipaay ti nalawag a tarabay iti rebolusyon a Pilipino tapno mawayawayaan ti umili, kasta met ti naimpusuan a panangsaranay iti dangadang ti proletaryado ken anakling-et iti nadumaduma a paset ti lubong.

Para iti NDF-Ilocos, ni Ka Joma ket naindaklan a lider iti rebolusyon a Pilipino ken ti sangalubongan ken saan a maartapan nga inspirasyon iti panangituloy ken panangpapigsa pay ti rebolusyonaryo a dangadang mi iti Ilocos.

Agbiag ka, Ka Joma! Agbiag ti rebolusyon a Pilipino!