Sang Nobyembre 2023, nagpa-guwa sang Communique sa Oslo, Norway ang Government of the Republic of the Philippines (GRP) kag National Democratic Front of the Philippines (NDFP) nga buksan ang hinun-anon sa kalinong sa tunga sang gobyernong Marcos Jr kag Communist Party of the Philippines (CPP)-New People’s Army (NPA)-NDF. Magasugod na unta ang pormal nga pagpungkuanay sang nagpirmahanay na ang duha ka magkahabig nagligad nga binulan. Apang luyag ini sabotahion ni National Security Adviser (NSC) Eduardo Año sang nagpa-guwa siya sang pahayag nga nagapamatuk nga mag-hinun-anon sa kalinong sa NDFP. Ini nga pahayag paghublas sang kontra kalinong kag matuod nga maduguon nga patakaran sang NSC sa pag-resolbar sang problema sang armadong konplikto sa pungsod.

Sa pagpasibangud ni Año nga ang CPP-NP-NDF amo ang wala nagasunod sa nakasugtan, sa matuod lang sa nagakatabo subong ang Armed Forces of the Philippines (AFP)-Philiipine National Police (PNP) kag NTF-Elcac lakip ang mapiguson nga Anti-teror Law ang nagamilitarisa sa kaumhan, nagapangbomba sa kabukiran kag kaumahan sang mangunguma, nagapamatay sang inosente nga mga sibilyan sa kaumhan kag kasyudaran, nagapamatay sang wala igabato nga mga hangaway kag mga konsultant sang NDFP, nagapang-abdak, nagapang-terorisa kag nagapasaka sang mga pato-pato nga kaso kag nagapangpriso sa mga aktibista.

Binutig ang pahambog ni Marcos Jr nga ang iya rehimen wala nagagamit sang maduguon nga pamaagi sa pagsolbar sang problema sang pungsod pareho ni Duterte, insurhensya man ukon droga. Ang kamatuoran wala siya sang kinalain sa ginbuslan niya nga tiraniko nga Duterte, mas masobra pa. Sa Negros, sa iya duha pa lang ka tuig nga paghari, may kapin sa 750 na ka kaso sang paganglapas sa tawhanon nga kinamatarung kon sa diin masobra 52,800 ang mga biktima, nga naglakip sa 50 ka mga mangunguma ang ginpamatay sang AFP, PNP kag mga paramilitar sini. Responsable man sila sa pagpatay sa 21 ka mga hors de combat kag pagkatanggong sa masobra sa 120 nga detenidong pulitikal ang padayon nga ara sa prisohan bangud sa mga pato-pato nga kaso sa bug-os nga isla.

Ang gusto lang ni Año nga i-blackmail kag tiplangon ang rebolusyonaryo nga kahublagan nga indi mag-atubang ang GRP sa peace talk kon indi sini isungka ang iya armas. Basi nalipat si Año nga ang armado nga paghimakas nagluntad na sa 55 ka tuig. Wala pa sang nagpungko nga papet nga rehimen ang nakadugmok sini bisan pa pasulit-sulit sila nga nagawakal nga sa ila panahon papason nila ang NPA. Magadamgo lang ang rehimen Marcos Jr kon mapapas niya sa iya termino ang CPP-NPA-NDF bisan pa sa superyor nga armas nga gin-ayuda sa iya sang iya amo nga imperyalismong US.

Sa matuod lang, indi ang CPP-NPA-NDF kundi ang US-Marcos nga rehimen ang nagtuga sang grabe nga krisis pang-ekonomiya sa pungsod. Ginpalargada sini ang neoliberal nga patakaran sa mando sang imperyalismong US nga nagwasak sang kabuhi kag palangabuhian sang malapad nga pumuluyo. Lapnagon ang pagpang-agaw sang mga kadutaan gikan sa kabukiran tubtob sa kasyudaran para sa mina, plantasyon para sa agro-industriyal kag reklamasyon sa mga kabaybayunan nga naga-dislokar sa linibo-libo ka mga pumuluyo. Indi ang CPP-NPA-NDF kundi ang US-Marcos nga rehimen ang nagapang-atake sa malapad nga pumuluyo nga nagapamatuk sa maki-dumuluong, maki-dalagko nga burgesya kumprador kag agalon mayduta nga mga proyekto paagi sa paggamit sang AFP kag mga ahensya sini para lang mapatuman ang mga neoliberal nga proyekto sa kabukiran kag kasyudaran.

Ginapang-atake man sang pasista nga rehimen ang lain-lain nga mga ligal nga organisasyon nga amo lang ang solo nga nagabulig sa mga biktima sang lapnagon nga inhustiya. Wala-tuo ang pasakaay sang mga pato-pato nga kaso nga gina-abutang nila kag ang iban ginpamatay para madulaan sang kusog kag suporta ang pagpakig-away sang pumuluyo. Ginpatuman sa pungsod ang indi deklarado nga Martial Law.

Kon padayon nga magmatig-a ang US-Marcos nga rehimen nga indi seryoso nga ipadayon ang pagpungkuanay sa kalinong padayon nga maga-indakal ang kaakig sang pumuluyo kag magasingki pa ang armadong rebolusyon.

Ang rebolusyon nga ginalunsar sang CPP-NPA-NDF, kawsa sang pumuluyo para sa ila kahilwayan kag demokrasya. May suporta kag ginasakdag ini sang malapad nga pumuluyong mangunguma kag mamumugon upod sa mga demokratikong sektor nga ginapigos kag ginahimuslan. Magapabilin kag magasulong ini tubtob indi mapukan ang isa ka mapiguson nga sistema kag mabuslan sang sosyalistang gobyerno sang pumuluyo.

Ginapanawagan sang NDF-Negros upod sa tanan nga mapinalanggaon nga pumuluyo sa kalinong, mga progresibo kag demokratikong sektor sa isla sang Negros nga suportahan kag sugdan na ang peacetalks. Aton man kondinaron kag hublasan si Gen. Año sa iya pagka-utok pulbora, militarista kag kontra-kalinong. Ang pagpatuman sang matuod nga reporma sa duta kag pungsodnon nga industriyalisasyon lamang amo ang makaresolbar sang armadong kagamo indi ang palunsar sang gyera batuk sa pumuluyo.