Nakumikom ti entero a provincial government ti Kalinga iti panangisayangkat ti Kalinga Day itatta a bulan ti February. Inkeddeng ti PLGU (provincial local government unit) nga ti tema ti selebrasyon ket “Naindaklan a Kultura, Isu’t Bileg ti Kalinga”.

Adda kinapayso ti tema ti Kalinga Day (wenno Kalinga Founding Anniversary), ngem kasapulan nga ilawag nu ania aya ti maibaga a naindaklan a kultura nga bileg ti probinsya.

Ti ipabpablaak ti Provincial LGU nga pakabuyaan ti naindaklan a kultura ken pamuspusan da tapno padur-asen daytoy ket narabaw ken nakaturong iti panang-komersyalisa, panangilako wenno panang-usar ti kultura kas negosyo ken pang-awis ti turista. Kastoy ti kaipapanan dagiti mayor nga aktibidad nga naisayangkat. Kaspagarigan, tapno kanu mapadur-as ti lokal a panag-abel ket naiangay ti Laga Fashion Show; adda ti kaatidogan a ba-ag ken kadakkelan a ginamat.

Ti usto a naindaklan a kultura a bileg ti Kalinga ket dagiti positibo ken progresibo nga ugali. Kangrunaan ti panagkaykaysa dagiti tribu tapno salakniban ti daga, biag, kabiagan ken rekurso nga dumanon inggana armado a panangilaban. Kasta met ti panangisakit ken panagtulong kadagiti kailyan nga marigrigat, agsaksakit, agtagibi ken dagiti uubbing, lallakay ken babbaket a saanen a makatrabaho. Adda met lang panangisakit ti dadduma a tribu (kas dagiti ka-bodong) ken umili. Dagitoy ti progresibo nga naindaklan a kultura nga imbagi ni Macliing Dulag ken Daniel Ngaya-an iti panangsalaknib ti Karayan Chico laban iti gandat ni Ferdinand Marcos Sr. a mangitakder ti dadakkel a dam iti nasao nga Karayan.

Ti maysa pay koma nga maikampanya nga naindaklan a kultura ket dagiti pamuspusan ti panangpaadu ti makan, kangrunaan ti bagas, kasta met ti panagpadur-as kadagitoy a pamuspusan. Nabayag nga ‘Rice Granary ti Kordilyera’ ti Tabuk. Nadanon ti kastoy babaen ti sistema ti panagmula nga nakasanggir iti panagkaykaysa ken panaka-organisado ti ili tapno masurot ti maymaysa nga kalendaryo manipud panagmula inggana panag-apit. Ditoy met a nakasilpo ti adu nga nainsigudan a ritwal ken salsala. Dagitoy ket saan koma mausar kas pagliwliwaan dagiti turista.

Nu kayat dagiti lokal nga opisyales ti LGU nga maimarka ti turay da iti probinsya, itandudo da koma ti progresibo nga naindaklan a kultura. Salakniban da koma dagiti kadagaan nga pang-agrikultura ken dadduma pay nga daga ken rekurso nga bagi dagiti umili. Lappedan da ti nasaknap ken tuloy-tuloy nga land conversion ken ti panagserrek dagiti dadakkel a pagminasan kas iti Makilala Mines ken dam projects para iti negosyo ti hydropower. Talmegan da koma dagiti programa nga mangsuporta kadagiti mannalon tapno mapaadu ti makan nga saan nakasanggir kadagiti imported ken magatgatang nga farm inputs. Suportaran da koma ti sistema ti edukasyon a mangisuro kadagiti agtutubo ti panangipateg ti daga ken panang-aywan ditoy. Maipatawid tayo koma kadakuada ti naranyag a pinaset ti Kalinga ken Kordilyera iti pakasaritaan ti pannakilaban kontra kadagiti mannakop ken diktador a ni Marcos Sr.

Irupir ken padur-asen ti progresibo ken rebolusyonaryo a naindaklan a kultura ti Kalinga!
Salakniban ti daga, biag, kabiagan ken rekurso!
Iturong ti kultura iti panangiyabante ti Nailian-Demokratiko a Rebolusyon inggana Sosyalismo!