Sa pag-komemorar sa kaadlawan ni Gat Andres Bonifacio subong nga adlaw, ginadumdom sang bilog nga rebolusyonaryong pwersa sa isla sang Negros ang ikaduha ka tuig nga anibersaryo sa pagkamartir ni National Democratic Front (NDF)-Negros consultant Ericson (Ka Fredo) Acosta upod sa lider-mangunguma nga si Joseph Jimenez. Wala kaluoy nga gintortyur kag ginpatay sila sang mga mersenaryong 47th kag 94th IB sadtong Nobyembre 30, 2022 sa Sityo Makilo, Barangay Kamansi, Kabankalan City, Negros Occidental.

Si Ka Fredo kaangay sa iya paborito nga baganihan nga si Andres Bonifacio nga tubtob sa iya katapusan nga kabuhi matuod-tuod nga nagpamuno sa pumuluyo sa paglunsar sang armadong paghimakas para sa kahilwayan sang pungsod batuk sa mga manugsakup nga mga dumuluong nga pungsod. Kasubong ni Bonifacio, patraidor man siya nga ginpatay sang reaksyunaryo nga sahi agud pahuyangon ang armadong paghimakas para isungka kag ibaligya ang kahilwayan kag demokrasya sang pungsod sa mga Amerikano.

Naghalin siya sa kabataang-estudyante kag mamumugon pangkultura. Nagmuklat sa pagka-makatarunganon sang paglunsar sang inaway banwa agud mabuslan ang dunot nga mala-kolonyal kag mala-pyudal nga sistema nga nagpaantus sa pumuluyong Pilipino tubtob nga nag-usoy sa rebolusyonaryong banas sa kaumhan. Tuig 2018 sang na-deploy siya sa isla sang Negros upod sa iya asawa nga si Kerima Lorena Tariman (Ka Ella) kag isa sa nagtib-ong sa ikatatlo nga kahublagan panadlong sa isla.

Bilang konsultant sang NDFP, isa man si Ka Fredo sa nagbulig sa pagdihon sang Comprehensive Agreement on Socio-economic Reforms (CASER). Ang CASER amo ang kasingkasing kag kalag sa hinun-anon pangkalinong sa tunga sang Gobyerno sang Pilipinas kag sa NDFP nga nagatinguha nga mapatuman ang matuod nga reporma sa duta kag pungsodnon nga industriyalisasyon bilang isa sang solusyon sa ugat sang armadong konplikto sa pungsod.

Kadungan sa padayon nga pagdemanda sang mga rebolusyonaryong pwersa para sa hustisya sa brutal nga pagpatay kay Ka Fredo kag Jimenez,nagapadayon man ang ila wala tupong nga pagsuporta sa matuod nga hangaway sang pumuluyo, ang New People’s Army (NPA) nga nagapangapin sa interes sang masang ginapigos kag ginahimuslan batok sa afp nga mga protektor sang nagaharing sahi.

Sa sini lang, namartir ang walo ka mga Pulang hangaway sa inaway batok sa mga bayaran kag berdugong 47th IB kag 15th IB sa Sityo Tigmaya sang Nobyembre 21 kag Sityo Suso sang Nobyembre 22, tanan sa Barangay Gatuslao, Candoni, Negros Occidental.

Sa Barangay Gatuslao, mayor nga nahamtang ang 6,652 ka ektarya nga oil palm nga plantasyon sang pamilya Consunji nga nagatuga sang kahalitan sa kabuhi kag palangabuhian sang mga mangunguma kag tumandok lakip na sa kapalibutan. Ginpakat diri sang reaksyunaryong estado ang 47th kag 15th IB agud pangapinan ang makahalalit nga proyekto kag punggan ang pagbato sang pumuluyo batuk sa pagpang-agaw sang ila kadutaan.

Lubos nga ginasaludohan sang NDF-Negros ang pagkabaganihan sang mga namartir sa Candoni. Kaangay kay Ka Fredo kag Jimenez, ginbuhis nila ang ila kabuhi para sa pagpangapin sa interes sang pumuluyong ginapigos kag ginahimuslan tubtob sa katapusan nila nga ginhawa.

Nagsayop ang reaksyonaryong gobyerno sa ila nga pagtuo nga mauntat ang rebolusyon. Bisan ano pa nga pagpalapnag sang AFP sang propaganda sang pagpang-into kag pagpaniplang, wala sang makawasak sa rebolusyon nga may madalom nga suporta sang masang ginapigos kag ginahimuslan.

Ang dugo nga gin-ula sang mga martir sa rebolusyon magaserbi nga dugang nga kusog nga magahatag inspirasyon sa pumuluyo nga magbato kag magbitbit sang armas. Kaangay sa rebolusyon nga ginsugdan nila ni Bonifacio, indi maghubas ang suporta sang anakbalhas nga nagahandum sang pagbag-o agud mahilway sa gapos sang pagpahimulos kag pagpamigos.