Tatta nga Aldaw ni Andres Bonifacio, ti patriyotiko ken rebolusyonaryo a tarigagay ti umili a Pilipino ket gumilgil-ayab tapno magibusanen ti imperyalismo, pyudalismo ken burukrata kapitalismo ken buangayen ti gimong a nawaya, natalinaay, nasaliwanwan ken pada-pada. Ti apoy ti armado a rebolusyon a ginangtan ni Andres Bonifacio ket agtultuloy a gumilgil-ayab ken sumaksaknap iti intero a pagilyan.

Itagtag-ay tayo dagiti armas ken bandera tapno padayawan dagiti martir ti agdama a nailyan demokratiko a rebolusyon. Iti daytoy nga okasyon ket isagsagut ti National Democratic Front-Ilocos ti naisangsangayan ken kangatwan a pammadayaw ken Victor “Ka Changli” Daligdig, kadre ken Nalabbaga a mannakigubat ti NPA-Kalinga, a napnatured a pannakirinnupak kadagiti pwersa ti AFP iti Barangay Allaguia, Pinukpuk, Kalinga idi Nobyembre 23, 2025.

Bigbigbigen tayo ni Ka Changli kas banwar ti umili a Pilipino a mangiyab-abante ti baro a demokratiko a rebolusyon. Maysa isuna nga anak ti tribu ti Kalinga nga kameng iti NPA iti kinaagtutubo na ket namuli iti pannakidangadang para iti bukod a pangngeddeng ken wayawaya ti maidadanes nga umili ti Cordillera ken intero nga umili a Pilipino.

Naipagalad ken Ka Changli ti tradisyunal a kinamaingel ti mannakigubat nga i-Kalinga, nga ad-adda pay nga inasa ti rebolusyonaryo ken proletaryo a takder ti panangiwaksi iti bukod nga interes tapno ipangruna ti interes ti kaadwan. Isu a malaksid iti naanep a panagtignay iti Cordillera, simmungbat isuna iti pagkasapulan iti kapada na a nalaing a kadre ken Nalabbaga a mannakigubat tapno tumulong iti panangiyabante iti armado a dangadang iti Ilocos.

Kaniwas daytoy iti mersenaryo a kagagalad dagiti pasista a soldado a ti kinasagana, kinatured ken kinarungsot iti panangranggas iti nakurapay a masa ket duron ti maal-ala da a dakkel a sweldo, promosyon, medalya ken merito iti panangsalaknib iti buklis nga interes ti amo da a dadakkel a burges kumprador, apo’t daga ken imperyalista.

Ti kabataan a mannalon, mangmangged, dadduma pay a nakurapay ken peti-burgesya ti agdama a henerasyon ni Andres Bonifacio nga adda iti unaan ti Baro Demokratiko a Rebolusyon. Isuda dagiti baro a Katipunero a rumrumwar manipud iti pagadalan da ken tumiptipon iti masa a mangmangged, mannalon ken nakurapay tapno isakad ti demokratiko a dangadang da. Isuda dagiti baro a Katipunero a sumamsampa iti New People’s Army ken mangiyab-abante ti gubat ti tapno dupraken ti panagari dagiti apo’t daga a mananggundaway ken mangdusdusa iti pasista a hukbo a mangrangranggas iti masa.

Iti bangir na, ti aso-aso a rehimen Marcos Jr ken dagiti mabaybayadan a pasista a tropa ti AFP-PNP dagiti traydor nga Emilio Aguinaldo iti agdama a panawen. Kas ti panangilako ni Aguinaldo iti Pilipinas iti imperyalista a US, ilaklako tatta ti rehimeng Marcos Jr ti soberanyaken kinabaknang ti pagilyan. Itultuloy tatta ti rehimen Marcos ti agum nga interes ni Aguinaldo nga iturayan ti dasig nga ilustrado ti Pilipinas tapno ad-adda pay nga agpabaknang.

Iti agdama, ti burukratiko a kunniber ti agar-ari a dasig ket dagiti igges a napaspas a rumrumwar iti agruprupsa a sistema ti malakolonyal ken malapyudal a kagimongan. Ti kanser ti korapsyon ket nauneg ken nalagda a nairamit iti kagimongan, idi pay sinanay ti imperyalista a US dagiti aso-aso daytoy nga ilustrado a mangimaton iti burukrasya kas negosyo, agpabaknang ditoy ken itandudo ti interes ti amo da. Dagiti pulitikal a dinastiya nga agar-ari iti Ilocos – dagiti Ortega, Singson ken Marcos ket dagiti kabayagan ken kabaknangan a dinastiya iti Pilipinas a nauneg a nakaramut ken natenneb iti burukratiko a kunniber. Inpatawid dagiti kaapwan da a burukrata kapitalista a dadakkel a burges kumprador ken apo’t daga ti monopolyo iti lupa, monopolyo iti tabako ken dadakkel a negosyo ken monopolyo iti bileg iti pulitika.

Dagiti kabataan ti Ilocos ket rumbeng nga umadaw ti inspirasyon iti kinabanwar ni Ka Changli ken dadduma pay a martir iti umili. Nagbuwis da ti biag para iti pannakawayawaya ti umili a Pilipino. Kas ken Ka Changli, nasken a matenneb da iti pangngeddeng ti sipupuso ken awan panagimbubukod a panagserbi para iti pannakawayawaya ti dasig nga anakling-et ken intero nga umili a Pilipino.

Iti panagbettak ti nakaro a krisis iti pulitika ken ekonomiya iti pagilyan tatta, dagiti kabataan nga Ilokano a mannalon, mangmangged, mangngalap, nakurapay, estudyante ken propesyunal ket kasapulan a makipaset iti panaglayus dagiti kabataan iti kalkalsada a mangbukbukel ti nabileg a boses ken danapeg a mangtitileng ken mangdayyeg iti agar-ari a dasig. Napatpateg pay ditoy, rumbeng a lumabes da kadagiti kalsada agturong iti kaaw-awayan tapno sumampa iti NPA ken iyabante ti gubat ti umili a mangduprak iti malakolonyal ken malapyudal nga istruktura ti gimong, mangitakder ti pudno a demokratiko a gubyerno ti umili ken manggibus iti panagari dagiti buklis ken agum.