Butaray nga pagtamay ha tawhanon nga katungod an ginkakalipay nga igrakudako ni 8th Infantry Division chief Maj. Gen. Ariel Orio nga “nakab-ot” kuno han iya mga pasista nga tropa kontra ha rebolusyunaryo nga kagiusan ha syahan nga katunga han 2025.

Sugad han nakahiaraan han militar, ginpapagawas ni Orio nga “napatay ha armado nga engkwentro” an diri mamenos ha unom nga ordinaryo ngan diri-armado nga parag-uma, sugad han mag-amay nga hira Renato ngan Raymart Gabac ha Paranas, Samar hadton Pebrero 5; mga parag-uma nga hira Noel Lebico Sr, Arnel Aquino ngan Nonoy Norcio ha Catubig, Northern Samar hadton Hulyo 5; ngan menor de edad nga hi Jason Padullo ha Borongan, Eastern Samar hadton Hulyo 15.

Iginhahambog liwat ni Orio an pagtamas-tamas han iya mga tropa ha internasyunal nga makatawo nga balaud, sugad han pagmasaker ha mga pasyente nga Pula nga mangaraway nga hira Juanito Selleza Jr (Ka Tibor) ngan Sadam Paclita (Ka Dimple), kaupod an Pula nga medik nga hi Lino Delante (Ka Dodong) ha Carigara, Leyte hadton Hunyo 18.

Iginkukunsidera niya nga “kadaugan” an “pagpapasurender” ha 27 nga indibidwal, kahuman han dirudiretso nga panhadlok, panhulga, panhugay ngan panhaharas ha ira han mga pasista nga tropa nga nagkakampo ngan naghahamlet ha gatus-gatos nga barangay ha kabaryuhan han rehiyon. An ginsesering ni Orio nga “pakigbuligay ha LGU” ha ungod militar nga paghahadi, samtang an “suporta tikang ha mga sibilyan” panhugay han sensilyo ha mga traydor. An mga baryo nga ginsesering niya nga “insurgency-free” amo adton madarahug nga ginbungkag an mga asosasyon han parag-uma, ginpupuypoy an pakigbisog para ha tinuod nga reporma nga agraryo, ngan diin ginpasamwak nira an huruygo, pangintriga, ngan pangabuso ha kababayin-an ngan kabatan-unan.

Naruruyag gud hiya nga magparayaw tungod kay waray pa hiya makuntento ha natikadako nga kawat tikang ha E-CLIP, SBDP, ngan iba pa nga mapan-uwat nga programa nga kontra-insurhensiya. Dugang ini ha nabubursa nga kikbak tikang ha mga proyekto nga imprastruktura, pagtotroso, higante nga pagmimina, ngan iba pa nga makahiribang nga pandambong ha kalibungan nga ira ginhahagudalan.

Sugad nala an kalisang ni Orio nga igpakita ha iya hepe nga hi Bongbong Marcos ano hiya kakarit ha pag-inalagad ha pasista, pakuri ngan niyutiyo hini nga rehimen. Kinahanglan niya igpakita nga usa hiya nga aktibo nga tagapuypoy han katawhan nga naato ngan nag-iinsister han tinuod nga katalwasan, hustisya ngan kauswagan. Kinahanglan niya pamatud-an nga maupay hiya nga tagdepensa han mga lokal ngan langyaw nga naghahadi nga klase nga nadambong ha katawhan.

Sanglit anuman nga pagrarakudako o pagbinuwa ni Orio, kada naabot an mga tropa han 8th ID ha mga baryo ginkakangalsan pa gihap hira han masa. Diri hira gintatapuran, tungod kay maaram an masa nga dugang nga pagpapakuri la an dara nira. Ngan samtang natikapintas an todo-gerra ha kabaryuhan ngan nadudugngan an utang nga dugo han pasista nga rehimen, mas nakukumbinsi an masa nga parag-uma nga pinaagi la han pagdaug han gerra han katawhan tinuod nga makakab-ot an hustisya kontra ha berdugo nga militar.

Ha luyo nga gapil, an mabayanihon nga mga kaapi han BHB nga namartir ha pagpapasulong han armado nga pakig-away sobra nga ginhinigugma ngan ginsasaludaran han masa. Bisan kun nasusubo gud ha pagkawara han mga bayani nga Pula nga mangaraway, nga ira gihapon nagin sangkay ngan kaupod ha pagpakyas ha terorismo han estado, hul-os pa gihapon an determinasyon nira nga igpadayon an makatadungan nga armado nga pakig-away, ngan umapi ha BHB kaupod an tikadamo pa nga napupukaw nga katawhan.